«Манчестер Сити» Гвардиола ўрнига икки номзодни танлади
"Ман Сити" раҳбарияти жамоанинг амалдаги бош мураббийи Пеп Гвардиола кетган тақдирда унинг ўрнини эгаллаши мумкин бўлган икки нафар асосий номзодни аниқлаб олди. Клуб мутасаддилари испаниялик мутахассис билан шартномани узайтириш ниятида бўлса-да, кутилмаган ўзгаришларга тайёргарлик кўришни бошлаган. Бу ҳақда Korrespondent.net хабар беради.
Асосий номзодлар қаторида "Байер" билан Германия чемпионлигини қўлга киритган Хаби Алонсо ҳамда Португалиянинг "Спортинг" клубида муваффақиятли фаолият юритаётган Рубен Аморим тилга олинмоқда. Ҳар икки мураббий ҳам замонавий футбол қарашлари ва тактик маҳорати билан инглиз клуби эътиборини тортган.
Гвардиоланинг амалдаги шартномаси 2025 йилнинг ёзига қадар амал қилади. Ҳозирча мураббий ўз келажаги борасида якуний қарорни эълон қилмаган, бироқ клуб раҳбарияти жамоанинг ўйин услубини сақлаб қола оладиган мутахассисни қидирмоқда.