Япония икки нафар ўзбекистонликни ноқонуний яшагани учун депортация қилди
Японияда ноқонуний яшаб келган икки нафар Ўзбекистон фуқароси мамлакатдан чиқариб юборилди.
Бу ҳақда Ўзбекистоннинг Япониядаги элчихонаси маълум қилиб, виза қоидаларига амал қилиш муҳимлигини яна бир бор таъкидлади.
Маълумотларга кўра, фуқаролардан бири талабалик визаси билан кирган, аммо ўқишдан четлатилганидан сўнг ҳам мамлакатни тарк этмаган. Иккинчи шахс эса қисқа муддатли виза билан кириб, белгиланган муддат тугаганига қарамасдан Японияда қолган.
Япония томони таъкидлашича, қисқа муддатли визалар орқали ишлаш қатъиян тақиқланган.
Шунингдек, талабалик визаси фақат таълим олиш учун берилиб, ўқиш тўхтатилса, яшаш ҳуқуқи ҳам бекор қилинади. Мутахассислар “туризм” ёки “талаба” визаси орқали узоқ муддат қолиш ёки ишлаш мумкинлиги ҳақидаги маълумотлар нотўғри эканини билдирди.
Қайд этилишича, ноқонуний яшовчилар аниқланса, улар ҳибсга олиниб, кейинчалик депортация қилинади.