Николас Жексон ёзда "Бавария" таркибини тарк этади
"Бавария" спорт директори Макс Эберл ҳужумчи Николас Жексон жорий ёзги трансфер ойнасида жамоани тарк этишини тасдиқлади. Мюнхен клуби раҳбарияти сенегаллик футболчини сотиб олиш ҳуқуқидан фойдаланмасликка қарор қилди. Бу ҳақда Goal.com хабар беради.
Жексон ўтган йили Лондоннинг "Челси" клубидан ижара асосида Германияга кўчиб ўтган эди. Шартномага кўра, футболчи маълум миқдордаги ўйинларда иштирок этмагани сабабли, "Бавария" уни тўлиқ сотиб олиш мажбуриятига эга эмас.
24 ёшли ҳужумчи мюнхенликлар сафида 29 та учрашувда майдонга тушиб, 10 та гол уришга эришди. У асосан юлдузли жамоадоши Гарри Кейннинг ўринбосари сифатида ҳаракат қилди.
Жексоннинг "Челси" билан амалдаги шартномаси 2033 йилгача мўлжалланган.
Шунингдек, клубни Леон Горетзка ва Рафаэл Геррейро ҳам тарк этиши маълум бўлди. Уларнинг шартномалари якунига етмоқда.
Шу билан бирга, Макс Эберл Майкл Олиснинг жамоада қолишини таъкидлади.
Олисга "Реал Мадрид" ва Англия премьер лигасининг бир қатор клублари қизиқиш билдираётганига қарамай, у Мюнхенда қолади. Франциялик футболчининг шартномаси 2029 йилгача амал қилади ва унда товон пули кўзда тутилмаган.