Самарқандда вояга етмаган қизларга нисбатан зўравонлик ҳолати текширилмоқда
Самарқанд вилояти Тойлоқ туманида икки нафар вояга етмаган қизга нисбатан зўравонлик ҳолати аниқланиб, бу бўйича текширув ишлари бошланган.
Маълумотларга кўра, фуқаро М.С. ўз қарамоғида бўлган 2017 ва 2019 йилларда туғилган қизларга нисбатан босим ўтказган. Унинг мақсади болаларнинг хорижда бўлган онасидан пул ундириш бўлгани айтилмоқда.
Текширув давомида аёл болаларга нисбатан жисмоний ва руҳий тазйиқ ўтказгани, шунингдек, ушбу ҳолатларни видеога олгани маълум бўлган.
Болалар омбудсмани ҳудудий вакили воқеа жойига бориб, уларни ҳимоя қилиш бўйича зарур чораларни кўрган.
Ҳозирда туман ички ишлар органлари томонидан ҳолат юзасидан терговга қадар текширув ишлари олиб борилмоқда.
Шу билан бирга, васийлик органи М.С.ни васийлик ҳуқуқидан маҳрум қилган. Болаларга етказилган жароҳатларни аниқлаш учун суд-тиббий экспертиза тайинланган.
Қизларнинг руҳий ҳолатини тиклаш мақсадида психологлар жалб этилган. Улар ҳозирда оилавий болалар уйига жойлаштирилиб, таълим муассасаларига расмийлаштирилган.
Мутахассислар болаларнинг хориждаги онасининг ота-оналик мажбуриятларини бажариш даражасини ҳам ўрганмоқда.