Исроил ва Фаластин байроғи туширилган кипа кийган ёзувчи ҳибсга олинди

Исроилда ғалати ва баҳсли воқеа юз берди. 20 апрель куни Тель-Авив яқинида устига Исроил ва Фаластин байроқлари туширилган кипа кийган эркак полиция томонидан қўлга олинди. Бу ҳақда CNN хабар тарқатди.

Маълум бўлишича, 53 ёшли ёзувчи ва Қуддус яҳудий университети ўқитувчиси Алекс Синклер ўзининг туғилиб ўсган шаҳри — Модииндаги қаҳвахоналардан бирида ишлаб ўтирган. Шу вақтда унинг олдига келган бир диндор киши кипаси “қонунга зид” эканини айтиб, жанжал чиқарган ва полиция чақирган.

Ҳодиса жойига етиб келган ҳуқуқ-тартибот ходимлари Синклерга бош кийимини мусодара қилишларини билдирган ва уни полиция бўлимига олиб кетган. Ёзувчининг таъкидлашича, у ерда тинтув қилинган, қисқа вақтга камерага жойлаштирилган ва бир қатор чекловларга дуч келган.

Синклер ижтимоий тармоқларда ёзишича, дастлаб полиция унинг кипасини қайтариб беришни истамаган. Кейинчалик эса унинг бир қисми қайтарилган, аммо бош кийимдаги Фаластин байроғи кесиб ташланган. Унинг фикрича, бу ҳаракатни полиция ходимаси амалга оширган.

Амалдаги қонунларга кўра, Исроилда Фаластин байроғини омма олдида намойиш этиш тўлиқ тақиқланмаган. Бироқ расмийлар бу ҳолат жамоат тартибига таҳдид солиши мумкин деб ҳисобласа, чеклов қўйиши мумкин. 2023 йилда миллий хавфсизлик вазири Итамар Бен-Гвир полицияга Фаластин байроқларини олиб ташлаш бўйича кўрсатма бергани ҳам маълум.

Полиция Синклернинг ушланганини тасдиқлаган бўлса-да, кипанинг кесилгани ҳақидаги даъволарга расмий изоҳ бермади.

Алекс Синклер эса ўз қарашларини очиқ баён қилди:
“Мен ўзимни ҳам сионист, ҳам инсон ҳуқуқлари ҳимоячиси деб биламан. Фаластинликлар ҳам ўз тақдирини ўзи белгилаш ҳуқуқига эга”, — деди у.

Ёзувчи бу воқеани кескин танқид қилиб, полиция ҳаракатларини қаттиқ қоралади. У аллақачон расмий шикоят берган ва товон пули талаб қилмоқда. Шу билан бирга, у келгусида ҳам икки байроқ туширилган кипа кийишда давом этишини маълум қилди.