Президентнинг ёшлик давридан қолган ноёб автомобили намойиш этилди
23 апрель куни Ўзбекистон Президенти Шавкат Мирзиёев Тошкент шаҳрининг Мирзо Улуғбек туманига ташриф буюрди. Ташриф чоғида давлат раҳбарининг илк меҳнат фаолияти билан боғлиқ қизиқарли жиҳатлар ҳам намоён этилди.
Жумладан, Президентнинг 1992–1996 йилларда мазкур туманга ҳокимлик қилган даврида фойдаланган хизмат автомобили — “Волга” русумли машина кенг жамоатчиликка кўрсатилди. Айни пайтда ушбу авто тарихий экспонат сифатида асраб-авайлаб сақланмоқда.
Шу билан бирга, ўша йиллардаги иш муҳитини акс эттирувчи тарихий хизмат кабинети ҳам қайта тиклангани диққат марказида бўлди. Бу эса ташриф давомида ўтмиш ва бугун ўртасидаги боғлиқликни янада ёрқин намоён этди.
Давлат раҳбари ташриф доирасида туман ҳокимлиги фаолияти, ҳудудда амалга оширилаётган қурилиш ва ободонлаштириш ишлари, шунингдек, инфратузилмани ривожлантириш бўйича олиб борилаётган лойиҳалар билан ҳам яқиндан танишмоқда.