Дилфуза Исмоилова: "Кунига 30-40 минг доллар даромад қилганман"
Эл севган комик актриса ва ўзининг шўх-шаддодлиги билан "Тошкентнинг эрка қизи" дея таърифланадиган хонанда Дилфуза Исмоилова яқинда берган интервьюсида кўпчиликни ҳайратда қолдирувчи воқеаларни сўзлаб берди. Санъаткор тарихда қолиш истаги, саломатлиги сабаб қимматбаҳо тақинчоқдан воз кечгани, ёш йигитлардан келадиган ишқий таклифлар ҳамда шахсий ҳаёти ҳақида очиқ-ойдин гапирди.
"Қозоғистондан катта маблағ билан қайтардим"
Хонанда ўзида кибр туйғуси йўқлигини алоҳида таъкидлаб ўтди. "Ижодимнинг илк даврларида Қозоғистон сафарларидан кунига 30-40 минг доллар топиб келардим. Швецияда 6 бор, Американинг эса 16 та штатида гастроль ва тўй хизматларида бўлганман. Аммо ҳеч қачон бу билан мақтанмаганман. Ҳатто замонавий телефонлардан фойдаланишни ҳам яқинда ўргандим. Мен учун манманлик — пасткашлик белгиси. Фақат аслияти паст кимсаларгина кибр билан ўзини баланд тутади", — дейди ижодкор.
"Ўзбекистоннинг энг бадавлат аёли бўлиш ниятим бор"
Дилфуза Исмоилова бойликни моддият билан ўлчамаслигини маълум қилди. Унинг фикрича, ҳақиқий бойлик — руҳий хотиржамлик ва яқинларнинг омонлигидир.
"Мен руҳан бой инсонман. Бойлик фақат қасрлар, тилла ва гавҳарларда эмас. Юртинг тинч бўлмаса, халта-халта пулинг ҳам асқатмайди. Одамлар мени бежиз 'бой аёл' деб аташмайди. Мен Яратганнинг берган неъматларига шукр қиламан, бироқ мол-дунё учун жон фидо қилмайман.
Худодан яна касб-коримга барака беришини сўрайман. Ёшим бир жойга борганда 'бой хотин' деган ном билан тарихда қолмоқчиман. Кўп пул топиб, катта машинамни тўлдириб, муҳтожларга эҳсон тарқатсам, уйсизларга бошпана, уловсизларга машина олиб берсам дейман", — дея ўз орзулари билан ўртоқлашди хонанда.
"Бойлар текин хизмат учун алдашади"
Хонанда баъзида инсонларнинг соддалигидан фойдаланишидан ранжишини яширмади. "Гоҳида феъл-атворим ёмонроқ бўлишини истаб қоламан. Кўпчилик меҳрибонлигимдан фойдаланиб, 'текинга хизмат қилиб беринг' деб тўйга таклиф қилишади, борсам — дабдабали маросим бўлаётган бўлади. Бу менинг йиллар давомида тинмай қилган меҳнатим-ку! Дилфуза Исмоилова даражасига чиқиш учун ижодимга юз миллионлаб маблағ сарфлаганман", — дейди у.
"Бурнимдаги бриллиантни деразадан отиб юбордим"
Санъаткорнинг хорижга сафари билан боғлиқ қизиқарли воқеа ҳам тилга олинди. Америкада бир аёлнинг бурнидаги ялтироқ тошга ҳавас қилган хонандага катта қиротли бриллиант совға қилишади.
"Ўзбекистонга келгач, бурним йиринглаб, соғлиғим ёмонлашди. Шифохонага бориб, уни олдириб ташладим ва аччиқ устида ўша қимматбаҳо тошни деразадан улоқтириб юбордим. Ҳатто афсусланмадим ҳам, фақат ўз вужудимни қийнаганим учун Тангридан мағфират сўрадим", — дейди актриса.
"Ёш йигитлар турмуш қуришни таклиф қилади"
60 ёш остонасида турган хонанда ҳануз мухлисларининг ардоғида эканини айтди. "Ёш-ёш йигитлар 'Сизни севаман, менга турмушга чиқасизми?' деб ёзишади. Уларга ҳазиллашиб, 'Укажон, сени ўғил қилиб олишим мумкин, лекин сенга теголмайман' деб жавоб қайтараман. Кўпчилик самимийлигим ва табиийлигим учун ҳурмат қилишини айтади", — дея суҳбатни якунлади Дилфуза Исмоилова.