Кам таъминланганлар учун бепул юридик ёрдам кенгайтирилди
Ўзбекистонда кам таъминланган фуқароларни ҳуқуқий жиҳатдан қўллаб-қувватлаш тизими янада кенгайтирилди. Бу 2026 йил 20 апрелда қабул қилинган ЎРҚ 1135 сонли қонун билан мустаҳкамланди.
Янги тартибга кўра, моддий имконияти чекланган шахслар суд жараёнида қўлланилган қонуннинг Конституцияга мослигини текшириш учун Конституциявий судга мурожаат қилганда ҳам давлат ҳисобидан юридик ёрдам олиш ҳуқуқига эга бўлади.
Шунингдек, юридик ёрдам кўрсатиш жараёни соддалаштирилиб, фуқароларнинг аризалари “Юридик ёрдам” ахборот тизими орқали тўғридан-тўғри тегишли суд органларига юборилиши белгиланди.
Мазкур ўзгаришлар аҳолининг ҳуқуқий ҳимоясини кучайтириш ва адолатли суд тизимига эришиш имкониятларини кенгайтиришга хизмат қилиши таъкидланмоқда.
Қонун расмий эълон қилинган кундан бошлаб кучга кирган.