Патрик Виейра Премер-лигадаги чемпионлик пойгаси ҳақида гапирди...
Патрик Виейра АПЛ 33-тур марказий учрашувидан кейин ўз фикрларини билдириб, чемпионлик учун курашда вазият янада қизий бошлаганини очиқ айтди. Собиқ яримҳимоячи Лондон клуби Arsenal ўйинини умуман ёмон деб айтмади, лекин ҳал қилувчи дақиқаларда тажриба ва совуққонлик етишмаётганини алоҳида таъкидлади.
Учрашувдан кейин турнир жадвалида интрига янада кучайди: Manchester City иккинчи ўринни эгаллаб турибди ва битта ўйини кам бўлган ҳолда пешқадам “тўпчилар”дан фақат 3 очко ортда қолмоқда. Бу эса чемпионлик пойгасини янада кескин ва асабий ҳолатга олиб кирмоқда.
Виейра фикрича, “Арсенал” майдонда ёмон кўринмади, аммо буюк жамоалар билан оддий кучли жамоалар ўртасидаги фарқ айнан энг муҳим вазиятларда намоён бўлади. Унинг айтишича, баъзи жамоалар ғалаба маданиятига эга, бошқалари эса бундай босим остида ўзини йўқотиб қўйиши мумкин. Бу фарқ бугун ҳам яққол сезилган.
Собиқ футболчи “Ман Сити”нинг аста-секин ўз формасини тиклаб бораётганини алоҳида қайд этди. Унинг фикрича, бу жамоа мавсум охирида ҳар доим юқори даражага чиқишни билади ва айнан шу жиҳат уларни чемпионликка яқинлаштиради.
“Арсенал” учун эса бу натижа жиддий психологик зарба бўлиши мумкин. Виейра жамоа катта босим остида қолишини ва кейинги ўйинларда улар қандай жавоб қайтариши катта савол эканини айтди.
У аввал ҳам Лондон клубининг психологик барқарорлиги ҳақида шубҳалар билдирганини эслатиб, бугунги ҳолат ушбу фикрларни янада кучайтирганини яширмади. Унингча, мавсум охирида тажриба ва совуққонлик ҳал қилувчи роль ўйнайди.
- "Мен доим жамоанинг психологик кучини савол остига қўйганман ва бугунги натижадан кейин шубҳам янада ортди. Менимча, «Ман Сити» ўз мақсадига эришади", – деди Виейра Sky Sports эфирида.
Хулоса аниқ: “Сити” темпни оширмоқда, “Арсенал” эса босим синовидан ўтмоқда. Чемпионлик пойгасида эса ҳар бир кичик хато катта нархга тушиши мумкин.