Edge браузери YouTube Premium функцияларини бепул қилиб берди

"Microsoft Edge" браузерининг мобил версияси "YouTube" видеоларини фонда ижро этиш имкониятига эга бўлди. Ушбу функция браузернинг "Edge Canary" экспериментал версиясида пайдо бўлган. Фойдаланувчилар бошқа вкладкаларга ўтганда ёки смартфоннинг асосий экранига қайтганда ҳам видео овози тўхтамайди. Бу ҳақда 3dnews.ru хабар беради.

Яна бир янгилик сифатида вкладкалар учун товуш индикаторлари жорий этилди. Бу фойдаланувчиларга қайси саҳифада видео ёки аудио ишлаётганини тезда аниқлаш имконини беради. Шунингдек, контекст менюси орқали сайт товушини ёқиш ёки ўчириш мумкин.

Аввалроқ "YouTube" платформаси пуллик обуначилар базасини кенгайтириш мақсадида учинчи томон браузерларида фонда видео кўриш имкониятини чеклаган эди. "Microsoft" ушбу чекловни айланиб ўтиш йўлини топди. Мазкур функция "YouTube Premium" обунаси нархи ошган бир пайтда фойдаланувчилар учун қулайлик яратади.