Meta сунъий интеллект даврида катта қисқартиришлар бошлайди
Meta компанияси 20 май куни кенг миқёсда ходимларни қисқартириш режасини амалга ошириши мумкин. Бу ҳақда Reuters ахборот агентлиги учта мустақил манбага таяниб хабар берди.
Манбалардан бирининг маълум қилишича, дастлабки босқичда компания умумий ходимларининг тахминан 10 фоизи, яъни 8 мингга яқин мутахассис ишдан бўшатилиши кутилмоқда. Кейинги босқичлардаги қисқартиришлар эса сунъий интеллект технологияларининг ривожланиш суръати ва компания стратегиясига қараб ўзгариб бориши мумкин.
Meta расмийлари бу маълумотлар юзасидан ҳозирча изоҳ беришдан бош тортган.
Қайд этилишича, ходимлар сонини камайтириш қарорлари сунъий интеллектдан фойдаланиш ортиб бораётгани ва иш жараёнларининг автоматлашуви натижасида самарадорлик ошиши билан боғлиқ.
Компания раҳбарияти келажакни камроқ инсон ресурслари ва кўпроқ AI технологияларига таянган бошқарув моделида кўрмоқда.
Meta аввал ҳам катта қисқартиришлар ўтказган: тўрт йил аввал 11 минг нафар ходим ишдан бўшатилган, 2023 йилда эса Марк Цукерберг яна 10 минг кишини қисқартириш ҳақида эълон қилган эди.
2025 йилда эса компания Scale AI стартапига тахминан 15 миллиард доллар сармоя киритган. Financial Times буни сунъий интеллект соҳасидаги энг йирик инвестициялардан бири сифатида баҳолаган.
Ҳозирги тенденция аниқ: AI ўсмоқда, штатлар қисқармоқда. Бу IT дунёсида янги “норма”га айланиб бормоқда.