Бир соатда 55 млн ишлайдиган хонанда Шаҳриёр 37 ёшни қарши олди
Аслида касби актёрлик бўлган, “Seni ko‘rdim”, “Isming yuragimda”, “Do‘stmisan”, “Uzilgan aloqa” каби тароналари орқали оммага танилган хонанда Шаҳриёр Аргонов 15 апрель куни 37 ёшни қарши олди. Шахсий ҳаётини оммадан йироқ сақлайдиган ижодкорлар қаторига кирувчи санъаткорнинг ҳаёт йўли ва ижодий фаолиятига назар ташлаймиз.
Шахсий ҳаёти
Шаҳриёр 34 ёшида оила қурган. У 2023 йил 11 июль куни Нураңгиз исмли қиз билан турмуш қурган. Тўй Самарқандда ўтказилган ва унда кўплаб шоу-бизнес вакиллари иштирок этган.
“Фамилиям ноёб”
— Аргонов фамилиясининг маъносини катталардан сўраш керак (кулади). “Арқон” сўзидан келиб чиққан бўлиши мумкин. Қизиғи, “аргон” деб аталадиган кимёвий элемент ҳам мавжуд, — дейди у.
Бугун Шаҳриёр нафақат Тошкент, балки Самарқандда ҳам энг талабгир хонандалардан бири ҳисобланади. У пойтахтдаги тўйларда тахминан 600 долларга хизмат кўрсатса, Самарқандда бир соатлик чиқиши 4500 долларга баҳоланмоқда.
“Мусиқий билимга эга эмасман”
Шаҳриёр 1989 йил 15 апрель куни Самарқанд шаҳрида таваллуд топган ва турли миллат вакиллари яшайдиган муҳитда камолга етган.
— Вокал билан шуғулланаман, лекин мусиқий таълим олмаганман. Яъни на коллежда, на консерваторияда таҳсил олганман. Эстрада актёри факультетида икки йил ўқиганман, амалиётим Оперетта театрида ўтган. Кўпчилик “мусиқий билим шарт” дейди, аммо санъат аниқ фан эмас. Уни бир неча йилда ўрганиб бўлмайди. Мен умрим давомида санъат ичида яшаб, уни англашни истайман. Бу мен учун дунёдаги ягона нодир китобни ўқишдек, уни тезда тугатишни хоҳламайман, — дейди у.
Ижодини дастлаб реп йўналишида бошлаган хонанда бугун миллий ва замонавий эстрадага кўпроқ эътибор қаратаётганини ҳам изоҳлаб ўтди:
— Санъатга кириб келганимда 15–16 ёшда эдим. Ўша пайтда репга бўлган қизиқишим жуда кучли эди ва шу йўналишга бутунлай берилиб кетгандим. Вақт ўтиб, ўзимни англай бошладим ва бошқа услубларда ҳам ижод қилиш истаги пайдо бўлди, — дейди хонанда.
Нега кино соҳасидан узоқлашди?
Шаҳриёр нафақат хонанда, балки актёр сифатида ҳам танилган. У иштирок этган “Bo‘rilar” ва “Tashlandiq” филмлари мухлислар томонидан яхши қабул қилинган.
— “Tashlandiq”даги ролим учун танқид эшитмаганман. Оддий томошабинлар ижроимни яхши баҳолашган. Сўнгги йиллардаги фильмларда эса илҳом ва таъсир кам. Кўплаб картиналар енгил ва чуқур маънога эга эмас, — дея фикр билдирган у.
АҚШ сафари ва услубдаги ўзгаришлар
Шаҳриёр 2011 йилда АҚШга сафар қилган. Унинг айтишича, бу сафарнинг асосий мақсади муҳитни ўзгартириш ва мусофирликни ҳис қилиш бўлган.
— Ростини айтсам, ҳозирги қўшиқларим ҳаммага бирдек ёқяпти деб айтолмайман. Ижтимоий тармоқларда “аввалгидек қўшиқларингиз йўқ” деган фикрлар ҳам учрайди. Аммо мен кескин ўзгарганим йўқ, услубимни босқичма-босқич янгилаяпман. Реп — менинг ҳаётим, айнан шу йўналишда танилганман, — дейди у.
АҚШдаги меҳнат ва ҳаёт
Шаҳриёр иккинчи марта АҚШга борганида ишлашга қарор қилган:
— Оилани таъминлаш — эркакнинг бурчи. Илҳомни кутиб ўтириб бўлмайди. Шу сабаб бошқа соҳаларда ҳам ўзимни синаб кўрдим. Логистика йўналишида ишладим. АҚШда ҳам ўзбек санъаткорларига талаб бор, — дейди у.
“Кенг шимларимни танқид қилишган”
— Ижодимнинг бошида ташқи кўринишим билан кўп тажриба қилардим. Бир хилликни ёқтирмайман. Ҳозир эса замонавий классик услубда кийинаман. Бу борада яқин дўстимнинг ҳиссаси катта. Илгари кенг шимларимни ҳатто қариндошларим ҳам танқид қилишарди (кулади). Бугун эса бутунлай ўзгарганман, — дейди санъаткор.
“Мен ўзим билан рақобатдаман”
Айримлар Шаҳриёрни хонанда Шоҳрух билан таққослайди.
— Шоҳрух билан тадбирларда кўришиб қолсак, саломлашамиз. Аммо у менга рақобатчи эмас. Мен фақат ўзим билан рақобат қиламан, — дейди у.
Ҳаёт сабоқлари
— Ҳаёт турли синовлар ва қувончлардан иборат. Ҳар бир вазият инсонни тарбиялайди. Илгари тезкор ва қизиққон эдим, ҳозир анча босиқман, — дейди хонанда.