Абдуқодир Ҳусанов АПЛда ёшлар рейтингида кучлилар қаторига киритилди

Замонавий футболда 23 ёшгача бўлган ўйинчилар клублар учун оддий истеъдод эмас, балки ҳақиқий драйверга айланиб улгурди. Шу сабабли футбол таҳлилларига ихтисослашган CIES Football Observatory мунтазам равишда айнан шу ёш тоифасидаги футболчиларнинг ўйинини чуқур ўрганиб боради.

Марказ мутахассислари 67 та лигани қамраб олган кенг кўламли таҳлил натижасида жаҳон бўйлаб 23 ёшгача бўлган энг самарали футболчилар рейтингини шакллантирди. Эътиборли жиҳати, бу сафар баҳолашда футболчиларнинг салоҳияти эмас, балки сўнгги олти ойдаги амалий натижалари — ўйиндаги барқарорлик, майдондаги таъсири ва индивидуал статистикаси асос қилиб олинди.

Ушбу нуфузли рўйхатдан Ўзбекистон миллий терма жамоаси ва "Манчестер Сити" клуби ҳимоячиси Абдуқодир Ҳусанов ҳам ўрин олди. 22 ёшли легионеримиз Англия Премьер-лигасида 79,9 балл билан 19-ўринни эгаллаб, кучлилар қаторига кирди.

Мутахассислар Ҳусановнинг чекланган ўйин вақтига қарамай, ҳужумларни бошлашда ва тўп билан чиқишда намоён этаётган ишончли ўйинини алоҳида таъкидлашмоқда. Қисқаси, майдондаги ҳар дақиқа у учун “proof mode” — ўзини исботлаш режими.

АПЛдаги рейтингда эса биринчи ўринни Флориан Виртц (Ливерпуль) 93,8 балл билан эгаллади. Ундан кейин Райан Шерки (Манчестер Сити) ва Льюис Холл (Ньюкасл Юнайтед) жойлашган.

CIES версиясига кўра АПЛдаги 23 ёшгача бўлган энг яхши футболчилар рейтинги қуйидагича кўриниш олди:

1. Флориан Виртц (“Ливерпуль”) — 93,8
2. Райан Шерки (“Манчестер Сити”) — 90,0
3. Льюис Холл (“Ньюкасл Юнайтед”) — 87,7
4. Нико О’Райли (“Манчестер Сити”) — 87,5
5. Милош Керкез (“Ливерпуль”) — 85,8
6. Алехандро Гарначо (“Челси”) — 85,4
7. Адам Уортон (“Кристал Пэлас”) — 85,3
8. Мало Гюсто (“Челси”) — 84,1
9. Майкл Кайоде (“Брентфорд”) — 82,6
10. Хави Симонс (“Тоттенхэм”) — 82,1
11. Алекс Хименес (“Борнмут”) — 81,6
12. Янкуба Минтех (“Брайтон”) — 81,6
13. Омари Хатчинсон (“Ноттингем Форест”) — 81,2
14. Конор Брэдли (“Ливерпуль”) — 80,9
15. Льюис Майли (“Ньюкасл Юнайтед”) — 80,8
16. Матеус Фернандес (“Вест Хэм Юнайтед”) — 80,8
17. Алекс Скотт (“Борнмут”) — 80,6
18. Ной Садики (“Сандерленд”) — 80,2
19. Абдуқодир Ҳусанов (“Манчестер Сити”) — 79,9
20. Ясин Аяри (“Брайтон”) — 79,7.

Эслатиб ўтиш жоиз, жорий мавсумда Ҳусанов "Манчестер Сити" таркибида Англия Лига кубогида ғолиб чиқиб, Европадаги илк совринини қўлга киритди. Ҳозирда “шаҳарликлар” ҳам Англия Премьер-лигаси, ҳам мамлакат кубогида чемпионлик учун жиддий кураш олиб бормоқда.

Қисқаси, Ҳусанов ҳали 22 ёшда, лекин аллақачон катта саҳнада. Агар шундай темпда кетса — бу фақат бошланиши.