Жавоҳир Синдоров тарих яратди, Президент уни шарафлади...

Президент Шавкат Мирзиёев иштирокида Ўзбекистон шахмати учун тарихий натижа қайд этган гроссмейстер Жавоҳир Синдоровни тантанали шарафлаш маросими бўлиб ўтди. Ушбу тадбирда мамлакат раҳбари спортчига юксак эътироф ва давлат мукофотини шахсан топширди.

Синдоров Халқаро шахмат федерацияси (FIDE) томонидан ташкил этилган Номзодлар турнирида ғолиб чиқиб, Ўзбекистон шахмат тарихида илк бор бундай натижани қайд этди. У мусобақа давомида дунёдаги энг кучли гроссмейстерларга қарши юксак маҳорат, сабр ва ирода билан кураш олиб борди.

Энг эътиборли жиҳати, шахматчи 14 партия давомида бирорта ҳам мағлубиятга учрамасдан, 10 очко тўплади ва рекорд натижа қайд этди. Бу ютуқ халқаро шахмат жамоатчилиги томонидан ҳам ноёб ҳодиса сифатида баҳоланмоқда.

Президент маросимда сўзга чиқиб, бу ғалаба нафақат Синдоровнинг шахсий ютуғи, балки бутун Янги Ўзбекистоннинг ғалабаси эканини таъкидлади. У спортчининг муваффақияти замирида узоқ йиллик меҳнат, устозлар мактаби, ота-она дуоси ва темир интизом турганини алоҳида қайд этди.

Давлат раҳбари шунингдек, Ўзбекистонда шахматга берилаётган эътибор натижасида дунё рейтингида кучли бешликка кирган икки нафар ўзбек гроссмейстери борлигини фахр билан тилга олди. Бу ҳолат миллий шахмат мактабининг салоҳияти тобора ошиб бораётганидан далолат экани айтилди.

Маросимда Синдоровнинг келгуси мақсадлари ҳам муҳокама қилинди. Унинг жаҳон шахмат тожи учун курашда муносиб иштирок этишига ва 2026 йил Самарқандда бўлиб ўтадиган Шахмат олимпиадасида мамлакат шаънини муносиб ҳимоя қилишига ишонч билдирилди.

Тадбир якунида Жавоҳир Синдоровга давлатнинг олий мукофотларидан бири — «Меҳнат шуҳрати ордени» тантанали равишда топширилди. У ўз навбатида Президентга ва халққа билдирилган ишонч учун чуқур миннатдорлик билдирди.