Аср охирида Европа аҳолиси кескин камайиб кетадими?
Европа статистика бошқармаси (Eurostat) маълумотига кўра, Европа Иттифоқи аҳолиси 2025–2100 йиллар оралиғида сезиларли камайишга юз тутиши мумкин. Тахминларга кўра, бу даврда аҳоли сони 53 миллион кишига, яъни 11,7 фоизга қисқаради.
Прогнозларга мувофиқ, 2029 йилга бориб ЕИ аҳолиси 453,3 миллион нафарга етиши мумкин. Бироқ кейинги ўн йилликларда бу кўрсаткич аста-секин пасайиб, 2100 йилга келиб 398,8 миллион нафарга тушиши кутилмоқда.
Демографик таркибда ҳам сезиларли ўзгаришлар кузатилади. 19 ёшгача бўлганлар улуши 20 фоиздан 17 фоизгача камаяди. Меҳнатга лаёқатли 64 ёшгача бўлган аҳоли улуши эса 58 фоиздан 50 фоизга тушиши прогноз қилинмоқда.
Шу билан бирга, қариялар сони ортиши кутилмоқда: 65–79 ёшдагилар улуши 16 фоиздан 17 фоизга, 80 ёш ва ундан катталар эса 6 фоиздан 16 фоизгача кўтарилиши мумкин.
Ҳозирги кунда Европа демографик пирамидаси юқори умр кўриш давомийлиги, паст туғилиш ва паст ўлим кўрсаткичлари билан характерланмоқда. Аҳолининг асосий қисми эса катта ёшдаги меҳнатга лаёқатли қатлам ҳисобига тўғри келмоқда.