Жавоҳир Синдаровнинг мураббийи жаҳон чемпионлиги режасини очиқлади

Фото: Niki Riga / FIDE

Жавоҳир Синдаровнинг мураббийи Роман Видоняк Номзодлар турниридаги ғалабадан сўнг шогирдининг келажак режалари ҳақида батафсил фикр билдирди.

Фoтo: UzChess

Унинг айтишича, бу натижа ҳали йўлнинг бошланиши ҳисобланади. Жамоа олдида тўрт босқичдан иборат узоқ муддатли мақсадлар қўйилган бўлиб, ҳозирча уларнинг иккинчиси муваффақиятли якунланган:

- "Бу ҳали энг катта натижа эмас. Биз режамиздаги тўрт босқичдан фақат иккинчисини якунладик", — дейди Видоняк.

Биринчи босқич Номзодлар турнирига чиқиш бўлган бўлса, иккинчиси унинг ғолибига айланиш эди. Энди асосий вазифа — жаҳон чемпионлиги учун кураш босқичига тайёргарлик кўриш:

- "Биринчиси Номзодлар турнирига чиқиш эди. Иккинчиси эса уни ютиш. Буни уддаладик. Энди навбат учинчи босқичга — жаҳон чемпионлиги учун баҳсга", — дейди Видоняк.

Видонякнинг таъкидлашича, энг мураккаб босқич — 2800 рейтинг даражасига чиқиш ва элита турнирларда барқарор устунлик қилиш ҳисобланади. У бу даражадаги натижаларни илгари Гарри Каспаров ва Магнус Карлсен каби афсоналар амалга оширганини эслатиб ўтди:

- "Энг қийини эса тўртинчи босқич бўлади: 2800 даражасига чиқиб, турнирларда доимий устунлик қилиш. Буни ўз вақтида Гарри Каспаров ва Магнус Карлсен уддалаган", — дейди Видоняк.

Мураббийнинг сўзларига кўра, бу мақсадга етиш учун камида икки йил жиддий меҳнат талаб этилади. У Синдаров ҳали тўлиқ шаклланиш жараёнида эканини ҳам қайд этди:

- "Бунинг учун камида икки йил жиддий ишлашимиз керак бўлади. Улар (Каспаров ва Карлсен) бу ёшда аллақачон тайёр эди, биз эса ҳали ҳам устимизда ишлаяпмиз", — дейди Видоняк.

Тайёргарлик жараёнида бир йил ичида 9 та ўқув йиғини ўтказилган бўлиб, улар асосан Мюнхен шаҳрида бўлиб ўтган ва ҳар бири 10–14 кун давом этган:

- "Тайёргарлик? Бир йил ичида 9 та йиғин ўтказдик. Улар асосан Мюнхенда бўлиб, ҳар бири 10-14 кун давом этди", — дейди Видоняк.

Иш жараёнида компьютер таҳлили эмас, балки шахмат тахтаси устида амалий машғулотлар устувор экани таъкидланди. Шу орқали турли мавзулар бўйича 40 мингга яқин машқлар бажарилган:

- "Шунингдек, биз одатда компютерсиз — шахмат тахтаси олдида ишлаймиз. Турли мавзулар бўйича тизимли тарзда мен тузган 40 мингга яқин машқларни бажарамиз. Мақсад — ўйинчининг фикрлашини ривожлантириш", — дейди Видоняк.

Видонякнинг фикрича, асосий мақсад — шахматчининг фикрлаш тезлиги ва стратегик кўникмаларини ривожлантириш. Бу эса келажакда жаҳон шахматида юқори натижаларга эришиш учун асос бўлиб хизмат қилади:

- "Мақсад — ўйинчининг фикрлашини ривожлантириш", — дейди Видоняк UzChess'га.