Мирзачўлда мансабдор пора олаётганда қўлга олинди
Жиззах вилоятининг Мирзачўл туманида Фавқулодда вазиятлар бўлими бошлиғи ўринбосари умумий овқатланиш масканида ўтказилган текширув давомида аниқланган камчиликлар бўйича маъмурий баённома расмийлаштирган.
Маълумотларга кўра, у ушбу ҳолатни “ёпиб юбориш” ҳамда ҳужжатларни судга йўлламаслик эвазига 3 миллион сўм талаб қилган. Бу орқали у расмий жараённи суиистеъмол қилишга урингани айтилади.
Тезкор тадбир Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида ўтказилган. Мансабдор шахс пулни умумий овқатланиш маскани раҳбаридан олаётган вақтда қўлга олинган.
Ҳолат юзасидан унга нисбатан жиноят иши қўзғатилган ва ҳозирда дастлабки тергов ҳаракатлари давом этмоқда.
Расмийлар фуқароларга бундай ҳолатларга дуч келганда 1520 қисқа рақамига мурожаат қилиш мумкинлигини эслатиб ўтди. Шунингдек, мурожаат қилувчиларнинг шахсий маълумотлари махфий сақланиши кафолатлангани таъкидланди.