Тўрт ҳокимга нисбатан интизомий чора қўлланиши мумкин
2025 йил Очиқлик индекси бўйича энг паст натижаларни Андижон вилояти ҳамда Тошкент шаҳар ҳокимлиги қайд этди. Шу билан бирга, рўйхатдан Тошкент вилояти ва Сирдарё вилояти ҳокимликлари ҳам жой олгани маълум қилинди. Бу ҳақда Коррупцияга қарши курашиш агентлигининг 2025 йилда давлат органлари ва ташкилотлари фаолияти очиқлигини таъминлаш бўйича амалга оширилган ишлар таҳлили, хусусан, Очиқлик индекси якуний натижаларига бағишланган ахборотда айтиб ўтилган.
Энг паст кўрсаткичларни намоён этган субъектлар қаторида банк тизимидан “Алоқабанк” АТБ, “Тошшаҳартрансхизмат” АЖ, Судьялар олий кенгаши, Ўрмон ва яшил ҳудудларни кенгайтириш, чўлланишга қарши курашиш агентлиги ҳамда “Ўзбекистон темир йўллари” АЖ ҳам борлиги қайд этилди. Ушбу ташкилотлар ҳам юқорида санаб ўтилган ҳокимликлар билан бирга индекснинг “қизил” тоифасига киритилган.
“Қизил” тоифада баҳоланганлар қаторида, жумладан, Андижон вилояти ҳокими Шуҳратбек Абдураҳмонов, Тошкент шаҳар ҳокими Шавкат Умурзоқов, Тошкент вилояти ҳокими Зойир Мирзаев ҳамда Сирдарё вилояти ҳокими Эркинжон Турдимов интизомий жавобгарликка тортилиши эҳтимоли борлиги билдирилган.
Агентлик маълумотларига кўра, “қизил” тоифага кирганларга нисбатан қонунчиликда белгиланган тартибда интизомий жазо чораларини қўллаш юзасидан таклифлар киритиш, очиқликни таъминлашдаги тизимли камчиликларни ўрганиш ва уларни бартараф этиш режалаштирилмоқда. Шунингдек, ушбу йўналишда фаолиятни яхшилаш бўйича комплекс чора-тадбирлар дастурини ишлаб чиқиш ҳам кўзда тутилган.
Гап шундаки, 2025 йил якунига кўра ўтказилган баҳолашда жами 97 та вазирлик, идора, муассаса ва маҳаллий давлат ҳокимияти органлари фаолияти қамраб олинган. Баҳолаш жараёни 84 та мезондан ташкил топган 8 та асосий индикатор асосида амалга оширилган. Якуний натижаларга кўра, 66 та давлат органи “яшил”, 22 таси “сариқ”, 9 таси эса “қизил” тоифада қайд этилган.
Эътиборга молик жиҳат шундаки, жорий йилги баҳолашда ўтган йилга нисбатан “яшил” тоифадаги идоралар сони 34 % га ошган, “сариқ” тоифа 36 % га, “қизил” тоифа эса 31 % га қисқарган.
Очиқлик бўйича энг юқори натижаларни “Навоий кон-металлургия комбинати”, “Ўзбекгидроэнерго”, “Ўзавтосаноат” АЖлари, Транспорт назорати инспекцияси, “Олмалиқ кон-металлургия комбинати” АЖ, Рақамли технологиялар вазирлиги ҳамда Адлия вазирлиги намоён этган.
Шунингдек, “қизил” тоифада баҳоланган давлат органлари ва ташкилотлари раҳбарларининг очиқлик соҳасида йўл қўйган камчиликлари ҳамда уларни бартараф этиш бўйича режалари Коррупцияга қарши курашиш Миллий кенгаши, Вазирлар Маҳкамаси ва Олий Мажлис Сенати йиғилишларида алоҳида кўриб чиқилиши режалаштирилмоқда.