"Арсенал"да "Сити"га қарши ўйин олдидан жиддий таркибий муаммо...
"Манчестер Сити" 19 апрель куни ўз майдонида Премьер-лига пешқадами "Арсенал"ни қабул қилади. Ушбу тўқнашувдаги ғалаба Хосеп Гвардиола шогирдларига очколар бўйича лондонликлар билан тенглашиш имконини бериши мумкин.
Бундай муҳим ўйин олдидан "Арсенал" сафида жиддий таркибий муаммолар пайдо бўлди. Сўнгги машғулотлардан олинган маълумотларга кўра, беш нафар футболчи — Риккардо Калафиори, Мартин Эдегор, Деклан Райс, Букайо Сака ва Юрриен Тимбер умумий гуруҳ билан машғулотларда қатнашмагани хавотир уйғотди.
Яқинда "Арсенал" ўз майдонида "Борнмут"га 1:2 ҳисобида мағлуб бўлган учрашувда тўлиқ ўйнаган Деклан Райснинг машғулотни ўтказиб юбориши эса энг катта кутилмаган ҳолатлардан бири бўлди.
Букайо Сака мушак жароҳати сабаб сўнгги уч ўйинни ўтказиб юборган, жамоа сардори Мартин Эдегор эса тиззадаги муаммо туфайли майдонга чиқмаяпти. Шунингдек, Юрриен Тимбер ва Риккардо Калафиори ҳам тўлиқ тикланмаган ҳолатда.
Агар ушбу футболчилар 19 апрелгача тўлиқ тикланмаса, "Манчестер Сити" учун устунлик янада ошиши мумкин. Бу эса мавсумнинг ҳал қилувчи ўйинларидан бири олдидан кучлар мувозанатини сезиларли ўзгартириб юборади.