Такер Карлсон баёноти шов-шув қилди: АҚШ сиёсатини ким бошқаради?
Америкалик таниқли журналист Такер Карлсон навбатдаги чиқишида АҚШ ташқи сиёсатига оид кескин ва баҳсли фикрларни илгари суриб, жамоатчилик эътиборини яна бир бор ўзига қаратди.
Унинг таъкидлашича, 1963 йил — АҚШнинг 35-президенти Жон Кеннеди ўлдирилган даврдан буён мамлакат раҳбарияти мустақил қарор қабул қилишда чекланган бўлиши мумкин. Карлсон фикрига кўра, шундан бери деярли барча президентлар ташқи сиёсий масалаларда муайян таъсирлар остида ҳаракат қилган.
Журналистнинг билдиришича, бу ҳолат айниқса Исроил билан муносабатларда яққол кўзга ташланади. Унинг фикрича, АҚШ раҳбарлари кўп ҳолларда айнан ушбу давлат манфаатларига мос қарорлар қабул қилиб келган ва бу сиёсат бугунги кунда мамлакат учун жиддий иқтисодий ва сиёсий оқибатларга олиб келмоқда.
Карлсон шунингдек, муаммони фақат муайян бир шахс ёки президент билан боғлаш нотўғри эканини ҳам таъкидлади. “Бу ерда гап фақат Доналд Трамп ҳақида эмас. Масала анча чуқурроқ — 9 миллион аҳолига эга давлат қандай қилиб 365 миллионлик мамлакат сиёсий йўналишига таъсир ўтказа олади? Бу қандай тизим?” — дея савол қўйди у.
Унинг айтишича, айнан шу механизмнинг қандай ишлаши ҳозирча очиқ ва аниқ жавобга эга эмас. Журналист бу масалага чуқурроқ ёндашиш ва уни таҳлил қилиш зарурлигини қайд этди.