Осиё кубогининг иккинчи ярим финал ўйинида Эронни мағлубиятга учратган Қатар терма жамоаси бош мураббийи Маркес Лопес ва учрашувнинг энг яхши футболчиси Акром Афиф матбуот анжуманида
қатнашишди.
- Акром Афифнинг ғалаба ҳақидаги фикри қандай?- Осон ўйин бўлмади. Бугун ғалабага биз муносиб эдик. Энг муҳим ўйин энди бўлади. Бизни фантастик тарзда қўллаб-қувватлаган мухлисларга раҳмат.
- Маркес Лопес, ғалаба ҳақида фикр билдирсангиз...- Мен бахтлиман. Ўйинчилар учун ҳам хурсандман. Биз жуда катта синовдан ажойиб тарзда ўтдик. Қатарлик мухлисларни ғалаба билан табриклайман. Энди бизда фақатгина финал ўйини қолди. Амалдаги чемпион сифатида ўз титулимизни муносиб ҳимоя қилишга ҳаракат қиламиз.
- Жамоани қабул қилганингизга икки ойгина бўлди. Бундай қисқа муддат ичида жамоага ўз фалсафангизни сингдириш қийин бўлмадими?- Ҳа, терма жамоага яқинда келдим, аммо мен анчадан бери Қатарда фаолият олиб бораман. Миллий жамоадаги деярли барча футболчини жуда яхши биламан. Ўйинчилар менинг ғояларимга тўлиқ ишонишди ва топшириқларимни аъло даражада бажаришди. Ҳаммаси шу. Бугун бизни қўллаб турган барча мухлисларга раҳмат айтаман. Ҳозирги пайт олдимизда турган ягона вазифа бу финал ўйинида ғалаба қозониш. Бугун ғалабани нишонлаб, эртадан финал ҳақида ўйлаймиз.
- Акром, Осиё кубоги Қатар мезбонлик қилаётган иккинчи катта турнир. Бир йил олдин Жаҳон чемпионатида қатнашдингиз. Мундиалдаги иштирок унчалик ҳам қониқарли чиқмади. Осиё кубогида Жаҳон чемпионатида орттирилган тажриба қанчалик қўл келмоқда?- Ҳар бир мусобақадан кўп нарса ўрганамиз. Жаҳон чемпионати биз учун биринчи мундиал эди. Ўшанда жамоа сифатида анча қийналгандик. Бу сафарги Осиё кубоги ўз уйимизда ўтаётган иккинчи турнир. Биз бу гал ҳам кўп нарса ўрганмоқдамиз. Умуман олганда, ҳар бир турнирдан янги сабоқ оламиз.
- Жаноб мураббий, финал ўйинида Иорданияга қарши қандай тактикада ҳаракат қиласиз?- Финалда нима қилишни ҳали билмайман. Эртадан финалга тайёрланамиз. Бугун эса Эрон устидан қозонилган ғалабани нишонлаймиз.
- Жаноб Лопес, Қатар термасини бошқараётганингизга кўп бўлмади. Жамоа бугун финалга чиқди. Сиз Қатар термасига тўлиқлигича ўз ғояларимни сингдирдим деб ҳисоблайсизми ёки Карлуш Кейруш қилган ишларни давом эттиряпсизми?- Кейрушга бўлган ҳурматим баланд. Мендан олдинги мураббийлар терма жамоада яхши фаолият олиб боришган. Декабрда терма жамоани қабул қилиб олдим. Ўз қарашларимни олдинга сурганим аниқ, лекин термадаги ҳамма нарсани ўзгартирдим дея олмайман. Кейрушга барча қилган меҳнати учун миннатдорчилик билдираман.
- Эрон терма жамоаси ҳимоясидаги муаммолар ҳақида Ғаленоидан ҳам сўрадик. Сизга ҳам шу саволни бермоқчимиз. Эрон термасининг ҳимояси ҳақида фикрингиз қандай?- Бугунги режамизга кўра, ҳужумда ўта тезкор ҳаракат қилишимиз керак эди. Олдинги чизиғимизда тўртта тезкор ўйинчи ҳаракат қилди. Улардан энг хавфлиси Акром Афиф. У Эрон ҳимоясига қандай муаммо туғдиришни яхши биларди. Бундай режалар баъзида яхши ишлайди, баъзида эса умуман фойда бермайди. Бугун омадимиз келиб, барчаси биз ўйлаган тарзда кечди.
