11 нафар ўзбекистонлик Санкт-Петербург марказида аёл учун муштлашди
Россиянинг Санкт-Петербург шаҳри марказида Ўзбекистон фуқаролари бир аёл учун муштлашган.
Россиянинг Санкт-Петербург шаҳри марказида Ўзбекистон фуқаролари бир аёл учун муштлашган. Бу ҳақда Россия Ички ишлар вазирлигининг Санкт-Петербург ва Ленинград вилояти бўйича бош бошқармаси матбуот хизмати хабар берди .
17-октябрга ўтар кечаси Достоевский кўчасида оммавий муштлашув содир бўлди. “Каттақўрғон” кафеси ёнида жанжал келиб чиққани ҳақидаги хабарни олган милиция у ерга йўл олди.
Ҳуқуқ-тартибот идоралари ходимлари томонидан 23 ёшдан 42 ёшгача бўлган 12 нафар Ўзбекистон фуқароси, жумладан, сартарош бўлиб ишлаётган 34 ёшли аёл ички ишлар бўлимига олиб келинди. Маълум бўлишича, кўчада айнан унинг туфайли жанжал чиққан. Натижада 2 киши ёпиқ бош мия жароҳати, мия чайқалиши ва кўплаб жароҳатлар билан касалхонага ётқизилган.
Қайд этилишича, қўлга олинганларга нисбатан иммиграция қонунчилигини бузганлик учун 6 та, майда безорилик учун 8 та баённома тузилган. Бундан ташқари, текширув натижаларига кўра жиноят иши қўзғатилган. Можаронинг тўрт нафар иштирокчиси безориликда гумон қилинмоқда.