НАТО Совуқ Урушдан бери биринчи марта Россия билан можаро учун мудофаа режаларини ишлаб чиқди, деб ёзди Reuters.
«Минглаб ҳужжатлар НАТОнинг Вилнюсда бўлиб ўтадиган саммитида тасдиқланиши керак. Чунки альянс шу пайтгача пост-совет Россиясини экзистенциал хавф сифатида кўрмас эди», — деб ёзади агентлик. Энди, НАТО Ҳарбий қўмитаси раҳбари Роб Бауэрнинг сўзларига кўра, НАТО давлатлари ҳар қандай вақтда можаро келиб чиқишига тайёр бўлиши керак.
«Инқирозни бошқариш ва жамоавий мудофаа ўртасидаги туб фарқ шундаки: вақтни биз эмас, балки бизнинг рақибимиз белгилайди», — дея Бауэрнинг сўзларини келтиради Reuters.
Агентлик маълумотларига кўра, альянс ўз аъзолари учун кучлар ва логистика таъминотини модернизация қилиш бўйича ҳам тавсиялар ишлаб чиқмоқда. НАТО бош котиби Йенс Столтенбергнинг фикрича, Иттифоқчилар қандай кучлар ва воситалар кераклигини, жумладан, қаерда, нимани ва қандай жойлаштириш кераклигини ҳозирдан аниқ билиб олмоқдалар.
