Россиянинг айрим вилоятлари раҳбарияти мансабдор шахсларга хорижга таътилга чиқишни яширинча тақиқлади, деб ёзди «Коммерсант». Жумладан, Новгород ва Брянск вилоятлари, Мари Эл, Чувашия, Шимолий Осетия ва бошқа ҳудудлар расмийларига саёҳат қилишдан тийилиш тавсия этилган. Брянск расмийларидан 2022 йил феврал ойидаёқ мамлакатни тарк этмаслик сўралган эди. Январ ойида «Единая Россия»нинг Тамбов вилояти Думасидаги раҳбари Юрий Плужников партиядошларидан чет элга, ҳатто Россияга нисбатан дўстона бўлган мамлакатларга ҳам бормасликни сўради. Свердловск вилояти парламентидаги «Единая Россия» фракцияси раҳбари Елена Чечунованинг айтишича, бу мавзу «фракция аъзолари учун норасмий тавсиялар форматида» муҳокама қилинган. 11 январ куни Уляновск вилояти раҳбари Алексей Русских фармонга имзо чекди, унга кўра мансабдор шахслар ва депутатларга чет элга чиқишдан тийилиш «тавсия этилган». Губернатор маъмурияти матбуот котиби Алексей Преображенский мамлакатни тарк этишни қонун билан тақиқлаш мумкин эмаслигини тан олди, чунки вилоят ҳокимияти бундай ваколатларга эга эмас. Бироқ, расмийнинг сўзларига кўра, «бу тавсия нимани англатишини ҳамма тушунади». Худди шундай ташаббус Вологда вилояти раҳбари Олег Кувшинников томонидан ҳам илгари сурилган. «Мамлакат учун мана шундай оғир вақтда дабдабали дам олиш масканларида дам олиш ва ижтимоий тармоқларда қасддан провокацион суратларни оммага кўрсатиш депутатлар, ҳар қандай даражадаги амалдорлар учун номақбулдир», деди 16 январ куни губернатор. Шу тарзда у Дубайда янги йил таътилини ўтказган «Единая Россия»дан Вологда Думаси депутати Денис Долженконинг саёҳатига муносабат билдирди. Хорижга таътилга кетгани учун танқид қилинган яна бир амалдор Мексикада дам олган Курск вилояти думаси депутати Максим Василйевдир. Сенатор Андрей Турчак уни «нажас» деб атади. Депутат ижтимоий тармоқларда эълон қилган суратлар туфайли жанжал келиб чиққан эди. The Insider нашрининг аниқлашича, санкциялар остида қолган Россия хавфсизлик амалдорлари, мулозимлари ва депутатларнинг фарзандлари ва бошқа қариндошлари хорижда, жумладан, НАТО ва Европа Иттифоқи мамлакатларида дам олишда давом этмоқда. Масалан, Ташқи разведка хизмати директори Сергей Наришкиннинг қизи Вероника янги йил байрамини Бали ва Дубайда ўтказди. Шунингдек, мудофаа вазири Сергей Шойгу қизи Ксения ҳам Дубайга саёҳат қилди. Юқори лавозимли ушбу шахслар қариндошларининг хорижга саёҳат қилиши Россия матбуотида муҳокама этилмади.
