Тошкентдаги “Илҳом” театрида чиққан ёнғинга электр симларининг эскириб кетгани туфайли юзага келган қисқа туташув сабаб бўлган. Бу ҳақда театр матбуот хизмати ёнғин хавфсизлиги идоралари томонидан ўтказилган дастлабки экспертиза натижаларига таянган ҳолда маълумот тарқатди.
“Экспертиза натижалари бўйича далолатнома театрга Янги йилдан кейин тақдим этилади. Биз уни ўша заҳоти ўзимизнинг интернет-ресурсларимизда эълон қиламиз”, дейилган хабарномада айни пайтда театр ёнғин чоғида шикаст етган кўргазма залини тартибга келтираётгани ва яқин орада бу ерда таъмир ишлари бошланиши қўшимча қилинган.
Пойтахт марказидаги “Илҳом” театри кўргазмалар залида 12 декабрга ўтар кечаси ёнғин содир бўлгани ҳақида Озодлик аввалроқ хабар қилган. Ўшанда ёнғин натижасида театр биносининг 1-қават холлининг ички қисми (80 квадрат метр майдон) ва жиҳозлари ёниб зарарлангани очиқланган.
Театр матбуот хизматининг 21 декабрь куни тарқатган хабарномасида “Илҳом”да спектакллар намойиши яқин кунлар ичида қайта тикланиши билдирилган.