Фото: Maxar Technologies Россия Арктика яқинидаги Узоқ Шимол ҳудудларида ўз ҳарбий базаларини кучайтиришда давом этмоқда, шу тариқа, ушбу минтақадаги иштирокини оширмоқда. Maxar Technologies компаниясидан олинган сунъий йўлдош тасвирларини ўрганиб чиқиб, журналистлар шундай хулосага келди, деб ёзади CNN. Суратларда Россиянинг сўнгги бир йил ичида такомиллаштирилган қатор радиолокация базалари ва учиш-қўниш йўлакларини кўриш мумкин. «Арктика минтақаси азалдан Россия нефть-газ сектори, шунингдек, унинг ядровий мудофааси учун муҳим бўлиб ҳисобланади, чунки бу ҳудудда замонавий ядро қурол-яроғлари ва сувости кемаларининг катта қисми жойлашган», — дейилади мақолада. Нашр қайд этишича, эриб бораётган музликлар жануби-шарқий Осиёдан Европага янги денгиз йўлларини очаётгани Арктиканинг Россия учун аҳамиятини янада оширади. Аввалроқ НАТО бош котиби Йенс Столтенберг Россиядан Шимолий Америкага энг қисқа йўл Арктика Шимолий қутби орқали ўтишини айтганди. Шунингдек, у альянс мамлакатлари Норвегия нефть ва газ инфратузилмасига қарши потенциал қўпорувчиликлардан тобора кўпроқ ташвишланаётганини, чунки Норвегия табиий гази Европага етказмаларнинг 20 фоиздан зиёдини ташкил қилишини таъкидлаганди. «Болтиқ денгизидаги қўпорувчиликдан кейин биз Болтиқ ва Шимолий денгизлардаги иштирокимизни кемалар, сувости кемалари, денгиз патруль самолётлари орқали оширдик. Бу қисман мониторинг учун, вазиятдан яхшироқ хабардор бўлиш учун, шунингдек, Россияни тийиб туриш ва бу муҳим инфратузилмани ҳимоя қилишга тайёрлигимизни унга кўрсатиш учун қилинди», — деди Столтенберг.
