Ўзбекистон бош вазири ўринбосари, энергетика вазири Жўрабек Мирзамаҳмудов энерготаъминотдаги узилишлар юзасидан изоҳ берди. Жўрабек Мирзамаҳмудовнинг сўзларига кўра, ҳозирги об-ҳаво шароити жиддийроқ талафотларнинг олдини олиш мақсадида режали чекловлар ўрнатишни тақозо этмоқда. - Тўғри, эътирозлар бор — электр ҳаммага ҳам етиб бормаяпти. Жуда кўп ўчишлар бўляпти. Лекин биз буни тан оламиз, инкор этмаймиз. Бу бўйича режали, тизимли ишлар қилиб, ҳозиргидай об-ҳаво шароитида чекловлар киритган ҳолда чиқиб кетмасак, эртага бундан-да жиддийроқ талафот бўлиши мумкин. Шунинг учун кескин чоралар кўришга мажбурмиз, — дейди вазир. Жўрабек Мирзамаҳмудов, шунингдек, Фарғонанинг Ўзбекистон туманидаги цемент заводи ишчиларининг интернетда тарқалган жамоавий мурожаатига ҳам муносабат билдирди. - Бошқа альтернатив ёқилғида ишлаши мумкин бўлган барча объектлар ҳаво кескин шунақа пайтда тармоқдан узилади. Бу ерда бироз бўрттириб гапирилган, 10 мингта ишчи ишсиз қоляпти деб. Бу цемент ишлаб чиқариш корхонасининг 10 мингта эмас, юздан сал ошиқроқ ишчилари бўлган. Ҳамма биладики, Вазирлар Маҳкамасининг тегишли қарори бор, ғишт заводлари, янгидан қурилаётган цемент заводлар барчаси кўмир, яъни альтернатив ёқилғида ишлаши керак. Ҳозир бу заводни табиий газга ким улаган, ким рухсат берган, буни алоҳида ўрганиб чиқамиз. Лекин корхона раҳбарлари шартнома шартларига кўра вақтида огоҳлантирилган. Ишчилар билан тегишли тарғибот ишларини олиб бориши керак эди, – деган у.
