АҚШнинг Аляска штатига қарашли авлиё Лаврентий оролида ҳарбий қайиққа ўтириб, сафарбарликдан қочган икки чукоткалик ушланди. Бу ҳақда Alaska's News Source сайти хабар қилди.
Нашр қайдича, россияликлар оролга 4 октябрь куни етиб келганлар. Улар маҳаллий аҳоли вакилларига Чукоткадаги Эгвекинот қишлоғидан сузиб келишганини айтишган. Мазкур қишлоқ АҚШдаги оролдан тақрибан 500 километрча нарида жойлашган.
Россиядан сузиб келганлар қўлга олиниб, оролдаги Гэмбелл шаҳрига йўлланган, кейинроқ улар Аляскадаги Анкориж шаҳрига кўчирилган.
Айрим маълумотларга кўра, Чукоткадан қайиқда келганлар АҚШдан сиёсий бошпана сўрашган.
Ҳозирги пайтда федерал хизмат вакиллари россияликлар АҚШ чегарасидан ўтиш тартиб-қоидасини бузган-бузмагани ва уларнинг мамлакатда бўлиш ҳуқуқига эга ёки эмаслигини аниқлаш билан бандлар.
Аляска губернатори Майк Данливи бунинг бир марта кузатилган ҳолат экани айтиб, Россиядан мигрантларнинг мунтазам равишда оқими кутилмаётганини урғулаган.
