Эфиопиянинг Тиграй ҳудудида 17 нафар киши масофадан бошқариладиган учувчи восита билан уюштирилган ҳужум оқибатида ҳалок бўлди. Бу ҳақда Associated Press хабар қилган. Авиазарба Май Себри қишлоғи яқинида амалга оширилган. Нобуд бўлганларнинг асосий қисми шу яқин атрофдаги ун заводида ишлаган аёллар. Агентликнинг ёзишича, бу каби ҳужумлар ҳукумат қўшинлари Тиграй ҳудудидаги исёнчиларни сиқиб чиқаришга уринаётгани туфайли охирги вақтларда тез-тез содир бўлмоқда. Сўнгги зарба Эфиопия бош вазири Аҳмад Абий АҚШ президенти Жо Байден билан телефон орқали суҳбатлашган ва унга фуқаролар муҳофазасини кафолатлаши, жангарилар билан мулоқот орқали муаммони ҳал этишни ваъда қилган куни берилганди. Байден Абийдан мамлакатда фавқулодда ҳолат эълон қилинганидан кейин ҳибсга олинган одамларни озод қилишни сўраган. Маълумотларга кўра улар орасида журналистлар ҳам бор. Ўтган ҳафтада Эфиопияда ҳукумат қўшинларининг Тиграй ҳудудига берган авиазарбаси оқибатида 56 киши ҳалок бўлган, яна 30 нафар одам турли даражадаги тан жароҳатларини олганди. Улар ички кўчишларни амалга оширган қочоқлар учун ташкил қилинган лагер ҳудудида бўлган.
