Бугун Наманган вилояти ҳокими Шавкат Абдураззоқов "Навбаҳор" футболчилари билан учрашган. Бизга етиб келган маълумотларга кўра, клубнинг 2022 йил учун режалари катта. Самвел Бабаян Сербиядан ўзи янги футболчиларни кўриб, танлаб келишни мақсад қилган. Канчельскис масаласи ҳал бўлгач, клуб трансферларга зўр бермоқчи. Ўзбекистон чемпионатидан клуб Нурилло Тўхтасинов, Драган Черан, Одил Ҳамробеков, Йован Жокич каби футболчиларга оғиз солишни мақсад қилган. "Навбаҳор"дан ташқари, "Қўқон-1912" ва "Сурхон" жамоаларининг ҳам молиявий ҳолатлари бошқаларга нисбатан анча яхши бўлиши ҳақидаги гап-сўзлар йўқ эмас. Қолаверса, Шавкат Абдураззоқов ва Хайрулла Бозоров ўртасида ҳақиқий футбол дербисини кўриш имкониятига эга бўламиз. Афтидан, "Нефтчи" ва "Навбаҳор" ўртасидаги тарихий эҳтиросли ўйинларни яна бир бор томоша қилиш арафасидамиз. Яна бир аниқ маълумот шундан иборатки, Самвел Бабаян билан янги шартнома бўйича келишувга эришилган ва у жамоани 2022 йил бош мураббий сифатида майдонга олиб тушади.
