Хитой АҚШни совуқ уруш менталитетидан воз кечишга, унинг ривожланишини холисона баҳолаб, ХХРга хаёлий рақиб сифатида муносабатда бўлишни бас қилишга чақирди. Бу ҳақда Хитой Ташқи ишлар вазирлиги расмий вакили Ван Вэньбинга таяниб «ТАСС» хабар берди.
«Биз АҚШни Хитойга хаёлий рақиб сифатида қараб, уни хоҳ асосли, хоҳ асоссиз тилга олишни тўхтатишга чақирамиз», — деди дипломат. Шу тариқа у АҚШ Қуролли Кучлари штаб бошлиқлари қўмитаси раиси генерал Марк Миллининг Хитой томонидан амалга оширилгани айтилган гипертовушли учар аппарат синовлари Америка томонини хавотирга солаётгани ҳақидаги сўзларига изоҳ берди.
«Биз АҚШни совуқ уруш менталитетидан ва нол қийматли ўйинларидан воз кечишга, Хитойнинг миллий мудофаасига холисона қарашга, кўпроқ ўзаро ишонч ва ҳамкорликни рағбатлантирадиган, шунингдек, бутун дунёда тинчлик, барқарорлик ва тараққиётга кўмаклашадиган чоралар кўришга чақирамиз», — деди Ван Вэньбинь.
16 октябрь куни Британиянинг Financial Times газетаси Хитой армияси ёзда икки марта гипертовушли қуролларни синовдан ўтказгани ҳақида хабар берди. Газетанинг ёзишича, синовлар 27 июль ва 13 август кунлари ўтказилган. 18 октябрь куни Хитой Ташқи ишлар вазирлиги матбуот котиби Чжао Лицзянь август ойида Хитой янги турдаги қуролни эмас, балки космик аппаратни синовдан ўтказганини айтди.
21 октябрь куни Ван Венбин газетанинг икки синов ҳақидаги даъвосига изоҳ берар экан, бу маълумотлар ҳақиқатга тўғри келмаслигини яна бир бор таъкидлади. Унинг сўзларига кўра, Хитой космик аппаратдан қайта фойдаланиш технологиясини синаб кўриш учун космик кемани синовдан ўтказган.
Генерал Милли кейинроқ Bloomberg агентлигига берган интервьюсида Хитойнинг гипертовушли учар аппаратни синовдан ўтказгани АҚШ раҳбариятида Совет Иттифоқи томонидан Ернинг биринчи сунъий йўлдоши учирилгани билан деярли бир хил таассурот қолдирганини тан олди. АҚШ президенти Жо Байден ҳам Хитойнинг гипертовушли ракеталарни синовдан ўтказганидан хавотир билдирди.
