Фото: AP Украина президенти Владимир Зеленский YES Brainstorming форумида Россия билан уруш эҳтимоли борлигини, бироқ бу Москва учун “катта хато” бўлишини айтди. “Фикримча, бўлиши мумкин. Бу юз бериши мумкин бўлган энг қўрқинчли нарсадир. Бироқ афсуски, бунинг эҳтимоли мавжуд”, деб жавоб қилган “Россия билан тўлақонли уруш хавфи борми?” деган саволга Зеленский. Унинг фикрича, 2014 йилда Москва “бу йўналишда олдинга бир қадам ташлаган”, бироқ украиналиклар “ортга бир қадам ташлаб”, вазиятнинг номақбул кўриниш олишини тўхтатиб қолишган. Сиёсатчининг таъкидлашича, агар Россия томонидан урушга йўл қўйилса, унда “Россия, Украина ва Беларусь қўшничилиги бошқа ҳеч қачон бўлмайди”. Зеленскийнинг айтишича, унинг АҚШ президенти Жо Байден билан учрашувида хавфсизлик масаласига кўп эътибор қаратилди. Унинг таъкидлашича, Байден Россия томонидан Украинага таҳдид мавжудлигини тушунади ва Киевнинг флот ҳамда ҳаво ҳужумига қарши мудофаа тизимини кучайтириш бўйича таклифини қўллаб-қувватлайди. Украина раҳбари форумда россиялик ҳамкасби Владимир Путин билан учрашиши эҳтимоли борасида ҳам тўхтатилиб ўтди. “Унинг давлати ва у хафа бўлмасин. Мени у (Путин) баъзи давлатлар раҳбарлари билан амалга оширадигандек шунчаки расмий учрашув эмас, балки ҳақиқий амалий учрашув кўпроқ қизиқтиради”, деб айтган Зеленский. Унинг таъкидлашича, Киев бундай учрашувни ташкиллаштириш устида иш олиб бормоқда, бироқ унинг ўтказилиши Россияга боғлиқ. “Ҳаммаси ҳам истаганимдек жадал бормаяпти ва фикримча, Россия бугун буни истамаяпти. Уларни (Россия) ҳудудларимизни оккупациядан чиқариш борасида гаплашишга қандай мажбур қила олишим бу менинг ички муаммоларимдир. Таҳдид қилиш, бақир-чақир билан ҳеч нарсага эриша олмаймиз. Учрашув бўлиши лозим. Биз мустақил давлатмиз, бироқ баъзи масалаларда уларга бу сиёсатни ўтказа оладиган даражада ҳали унчалик кучли давлат эмасмиз”, деб таъкидлаб ўтган Украина раҳбари. Украина президенти матбуот котиби Юлия Мендель апрелда Киев Донбассга ҳужум қилишни режалаштирмаётганини айтган. “Украина ўз ҳудудига ҳужум қила олмайди ва ўз фуқаролари билан уруш қила олмайди”, деб айтган Мендель. Кейинроқ Зеленский офиси раҳбари маслаҳатчиси Алексей Арестович Украина Россия ҳужумига жавобан, Киевда бошқа танлов қолмагандагина Донбассда ҳужумга ўтиши мумкинлигини айтган. Ўз навбатида Россия ташқи ишлар вазири Сергей Лавров Украина билан Донбассда урушга киришишдан қочиш лозим деб ҳисоблашини айтган. “Агар бу бизга ва айирмачиларга боғлиқ бўлса, унда урушдан қочиш мумкин ва зарур”, деб айтган Россия вакили.
