Россия парламенти депутати Валентина Терешкованинг қизи Елена Лапшина ва унинг эри Андрей Родионов Италиянинг Бергамо шаҳрида 250 минг евро турадиган квартирага эга.
Бу ҳақда Алексей Навальний жамоаси маълум қилди.
Бу квартиранинг майдони 123 квадрат метр бўлиб, 49 квадрат метр кенгликдаги "улкан ер ости гаражи" га ҳам эга. У 2013 йилда сотиб олинган.
"Бу Бергамо, Италиянинг шимолидаги, Миландан 50 километр узоқликдаги шаҳар. Ажойиб жой, Алп тоғлари қўйнида. Терешкова болалари ва набиралари учун ўзи депутатлик қилиб, қонунлар қабул қилаётган Россияни эмас, айнан Италиянинг шу қисмини танлаган", - деб ёзади тергов муаллифлари.
Валентина Терешкова - 1963 йилда космосга учган биринчи космонавт аёл. Ўшандан буён у СССРда ҳам, Россияда ҳам турли номенклатура лавозимларида ишлаб келади.
2020 йилда Валентина Терешкова Россия Конституциясига Владимир Путиннинг президентлик муддатини бекор қиладиган ва 2036 йилгача ҳокимиятда қолишига имкон берадиган ўзгартириш муаллифи бўлган.
