Farg‘ona viloyati huquq-tartibot organlari Quva tumanida 48 yoshli shaxs 11 yashar bolani zo‘rlab kelgani haqidagi iddaolar yuzasidan tekshiruv olib bormoqda.
Bolaning onasi voyaga yetmagan o‘g‘lini o‘z amakisi ikki yil davomida zo‘rlab kelgani haqida bloger Aqida Xanumga so‘zlab bergandi.
Blogerning jabrlanuvchi bolakay va uning onasi bilan o‘tkazgan video suhbati ijtimoiy tarmoqlarda tarqalgach, Quva tumani Ichki ishlar bo‘limi tergovga qadar tekshiruv boshlagan.
Bolani zo‘rlaganlikda gumonlanayotgan amakisi hibsga olingan. Bloger Aqida Xanumning Ozodlikka aytishicha, endi ayol “aytganlaridan tonmoqda”.
Bolaning o‘zi va onasi bloger Aqida Xanum bilan suhbat davomida ko‘zida yosh bilan bu ish 2018 yoki 2019 - yilda boshlanganini aytib berishgan.
“Birinchisi buvamni tomorqasiga ekinlarni sug‘orishga borganimizda bo‘lgan. Ikkinchisi 3-4 oydan keyin qo‘yimiz tuqqanida shuni emizishga birga borganimizda bo‘lgan. Og‘riq zo‘ridan ko‘pincha buvamga aytmoqchi bo‘lganman, ammo aytolmaganman. Bu ish anchadan beri davom etib kelardi. Bir kuni, noiloj, buvamga aytishga majbur bo‘ldim. O‘tgan yili may oyida oyim meni shifokorga olib bordilar”, deydi 11 yoshli bola bloger Aqida Xanum bilan suhbatda.
Bolaning onasi suhbat davomida o‘g‘lini amakisi zo‘rlab kelgani haqida ancha oldin xabar topganini aytadi.
“Bir kuni o‘g‘limning zo‘rlanganini bilib qoldim. Shunda turmush o‘rtog‘imga ‘Akangiz o‘g‘limizni zo‘rlab qo‘yibdi, xabaringiz bormi?’ desam, ‘ha, bilaman. Lekin nima qilay? U meni akam. So‘yib tashlamayman-ku’ dedi”, - gapirib beradi bolaning onasi.
O‘tgan yil may oyida bolaning onasi uni shifokorga olib borgan. Hodisa haqida shifokordan tashqari uchastka noziri ham bilgan, biroq ular hech qanday chora ko‘rmagan.
Aqida Xanumning “nima uchun turmush o‘rtog‘ingizning akasi ustidan ichki ishlar organlariga ariza yozmadingiz? Faqatgina noqulay bo‘lgani uchunmi?” dagan savoliga ayol bosh irg‘ab javob beradi.
“Endi ona hamma aytganlaridan tonyapti”
Blogerning jabrlanuvchi bolakay va uning onasi bilan o‘tkazgan video suhbati ijtimoiy tarmoqlarda tarqalgach Quva tumani Ichki ishlar bo‘limi tergovga qadar tekshiruv boshladi.
Bolani zo‘rlaganlikda gumonlanayotgan amakisi hibsga olingan. Bloger Aqida Xanumning Ozodlikka aytishicha, endi ayol aytganlaridan tonishni boshlagan.
“Suhbatni videoga yozib oldim, chiqardim. Kecha Farg‘ona IIBsi boshlig‘i menga telefon qildi. Amakisini olib kirib qo‘ydik, sud-med ekspertiza qilyapmiz, lekin onasi “unaqa narsa bo‘lmagan”, deb turib olyapti, dedi. Qarindoshlari amaki qamalib ketsa oq qilamiz, deb bosim qilishgan. Endi ona hamma aytganlaridan tonyapti”, - deydi bloger..
Ozodlik amakisi tarafidan jinsiy zo‘rlab kelingani iddao qilinayotgan 11 yashar bolakayning onasiga bog‘lana olmadi.
"Andisha qursin"
O‘zbekistonda maishiy va jinsiy zo‘ravonlik holatlarini yoritib kelayotgan bloger Aqida Xanumning Ozodlikka aytishicha, “o‘zbekchilik”, “andisha” kabi illatlar sabab ko‘plab holatlar yopilib ketyapti.
“Menga juda ko‘p odamlar yozishyapti. Yoshligida jinsiy zo‘rlangan, ota-onalari andisha tufayli ishni ko‘tarib chiqishmagan. Bu bolalar ruhiy jarohat olib, katta bo‘lganida o‘zini o‘zi o‘ldirish darajasiga yetganlari ham bo‘lyapti. Zo‘ravonlik holatlari yopilib, ko‘p-ko‘p odamlarning hayoti sinib ketyapti. Andisha qursin. Shu andisha tufayli qancha holatlar yopilib ketyapti. Qarindoshi zo‘rlasa, qamalib ketishidan qo‘rqib, bosim ostida ish to‘xtatilgan holatlar haqida hozir menga ko‘p yozishyapti”, - deydi bloger.
Farg‘ona viloyatida 11 yoshli bola ikki yil davomida o‘z amakisining jinsiy tajovuziga uchragani, ota-onasi esa andisha tufayli bu holatni yashirib kelgani ijtimoiy tarmoqlarni larzaga soldi.
Ba’zi tarmoq foydalanuvchilari tarafidan bolaning ota-onasini ham jazoga tortish kerak, degan fikrlar aytilyapti.
“Uydagi gapni ko‘chaga chiqarma, yopig‘liq qozon yopig‘ligicha qolsin, degan narsa qon-qonimizga singib ketgan. Lekin, shuni orqasidan begunoh bolalarimiz azob chekishyapti. Bu ishni shunchaki tashlab qo‘ymaslik kerak. Otani otalik, onasini onalik huquqidan mahrum etish, kerak bo‘lsa jazolash kerak. Qachongacha davom etadi bunaqa ishlar”, - deb izoh qoldirgan Feysbukda e’lon qilingan video ostida Sher ismli foydalanuvchi.
O‘zbekiston Jinoyat kodeksida pedofiliya bo‘yicha alohida modda yo‘q. Bunday jinoyatni qilganlarga 7 yildan 10 yilgacha bo‘lgan qamoq jazosi ko‘zda tutilgan 119 - Jinsiy ehtiyojni zo‘rlik ishlatib g‘ayritabiiy usulda qondirish hamda 129-O‘n olti yoshga to‘lmagan shaxs bilan jinsiy aloqa qilish kabi moddalar qo‘llaniladi.
O‘zbekiston JKning pedofiliyada ayblanganlarga nisbatan qo‘llanadigan mavjud 129-moddasi "uch yuz soatgacha majburiy jamoat ishlari yoki ikki yilgacha axloq tuzatish ishlari yoxud bir yilgacha ozodlikni cheklash" jazosini nazarda tutadi.
30 - iyun kuni Farg‘ona viloyat, O‘zbekiston tuman Jinoyat ishlari bo‘yicha sudi 12 yashar o‘quvchisiga jinsiy aloqa taklif qilgan 42 yashar o‘qituvchiga 15 sutkalik ma’muriy qamoq jazosi tayinlagandi.
Mahkama qarori jabrlanuvchi yaqinlarining noroziligiga sabab bo‘lgan.
Ozodlik bilan gaplashgan O‘zbekiston tumanida yashovchi onalardan biri¸ sud tizimini voyaga yetmagan bolalar¸ xususan qizlarni himoya qilmayotgani uchun tanqid qilgan.
