Мамлакатимизда гиёҳвандлик воситалари билан қонунга хилоф равишда муомалада бўлиш ва уларнинг ноқонуний айланмасига қарши миллий қонунчилик асослари яратилган, шунингдек қонунбузилиш ҳолатлари учун жавобгарлик белгиланган.
Шунга қарамасдан, гиёҳвандлик воситаларини юртимизга яширинча олиб киришга бўлган уринишлар ҳамон учраб турибди.
Хусусан, Сурхондарё вилояти божхона бошқармаси “Айритом” чегара божхона пости ходимлари томонидан аниқланган қонунбузилиш ҳолатлари ҳам шулар жумласидандир.
Мазкур божхона постига пиёда тарзда кириб келган қўшни давлат фуқароси Р.М. белгиланган тартибда божхона назоратидан ўтказилганда, унинг курткасининг чўнтаги ичида, тўқ яшил рангли соф оғирлиги 1,2 грамм бўлган “гашиш” гиёҳвандлик воситаси борлиги аниқланди.
Яна бир ҳолатда эса “Айритом” чегара божхона пости орқали юртимизга ўтаётган қўшни давлат фуқароси Қ.Ҳ. холислар иштирокида шахсий кўрикдан ўтказилганда, унинг ҳамёни ички чўнтаги ичида соф оғирлиги 1,69 грамм бўлган “гашиш” гиёҳвандлик воситаси борлиги аниқланди.
Навбатдаги икки қонунбузарни ҳам худди шундай қисмат кутаётган эди. Мамлакатимизга мазкур пост орқали кириб келган хориж фуқаролари М.Ҳ. ва М.О. божхона ходимлари томонидан божхона назоратидан ўтказилганда, уларнинг ўзларига тегишли бўлган ёндиргичнинг таг қисмларига ёпиштирилган ҳолатда бўлган 0,17 грамм ва 0,12 грамм “гашиш” гиёҳвандлик борлиги фош этилди.
Ҳозир юқоридаги ҳолатлар бўйича божхона органлари томонидан терговга қадар текширув ҳаракатлари олиб борилмоқда.
