Санкт-Петербургда Ўзбекистоннинг икки фуқароси қулликдан озод қилинди, деб хабар бермоқда «Российская газета».
Маълум қилинишича, ўзбекистонлик эр-хотин Васильевск оролидаги дўконлардан бирида ишлаган, дўкон эгаси сотувчиларни шафқатсизларча калтаклаган.
Ишчилар паспортлари олиб қўйилгани сабабли дўкондан қочиб кета олмаган. Бундан ташқари, савдо шохобчаси эгаси сотувчиларни унга нисбатан чора кўрилмаслигини айтиб қўрқитган ва уларни қонунларни бузишга, хусусан, кучли спиртли ичимликлар сотишга мажбур қилган.
Охир оқибат эр-хотин халқаро муносабатлар қўмитасига хат ёзишга эришган. Амалдорлар туман маъмурияти ходимлари билан бирга дўконга бориб, полиция чақирган.
Натижада хабар тасдиқланиб, улар дўконда ҳақиқатан ҳам қуллик ҳолатида сақлангани аниқланган.
Ҳозирда эр-хотин ўз иш берувчиси устидан ариза ёзган. Уларга маъмурият ва қўмита, Ўзбекистон бош консуллиги мутахассислари ҳамда мигрантларга ёрдам берадиган хайрия фонди ходимлари томонидан ҳуқуқий ёрдам кўрсатилмоқда.
