Фото: Getty Images Австриядаги Инсбрук тиббиёт университети олимлари коронавирусга чалиниб чиққанларда касалликка қарши иммунитет камида саккиз ой давомида сақланиб қолишини аниқлади, деб хабар бермоқда «РБК» университет сайтига таяниб. Тадқиқотчилар COVID-19’га чалинганлардан ўтган йилнинг апрель ва ноябрь ойларида Ишгль тоғ-чанғи курортида олинган антитана тестларини таҳлил қилган. Биринчи тадқиқотдан сўнг, апрель ойида коронавирусга антитаналар бўлган иштирокчиларнинг деярли 90 фоизида у саккиз ойдан кейин ҳам сақланиб қолгани аниқланган. Хабарда айтилишича, Ишгль курортида ўтказилган ушбу тадқиқот COVID-19’га қарши иммунитетни ўрганиш бўйича энг катта ва узоқ давом этган тадқиқотлардан бири бўлиб, унда 900 дан ортиқ киши қатнашди. Уларнинг 18 ёшдан 89 ёшгача бўлган 801 нафари ҳар иккала тадқиқотда иштирок этган. Тадқиқот доирасида вирус билан касалланган ҳужайраларни аниқловчи ва бартараф этишга қодир ўзига хос иммун ҳужайралар — Т-ҳужайралар борлигини аниқлаш мақсадида 93 та намуна қўшимча равишда текширилган. Ҳужайравий иммунитет мавжудлиги антитана титрлари деярли бўлмаган ёки энди аниқланмайдиган намуналарда борлиги тасдиқланган. Шундай қилиб, олимлар ҳатто тестлар антитаналарни аниқлай олмаса ҳам, иммунологик жавоб борлигини истисно этмаяпти. Аввалроқ COVID-19’га қарши иммунитет камида 8 ой сақланиб туришини австриялик олимлар ҳам маълум қилганди. «Ушбу тадқиқот SARS-CoV-2 вирусига қарши вакциналар узоқ вақт давомида ишлашининг энг ишончли далилидир. Илгари кўплаб тадқиқотлар коронавирусга қарши антитаналарнинг биринчи тўлқини дастлабки бир неча ойдан кейин сусайишини кўрсатиб, одамлар тезда иммунитет йўқотиши мумкинлигини хавотирини келтириб чиқарганди. Ушбу янги илмий иш бу қўрқувни йўқ қилади», — деган эди 2020 йилнинг декабрида 25 кишидан иборат гуруҳда тадқиқот ўтказган олимлар. Эслатиб ўтамиз, аввалроқ коронавирусга қарши антитаналар инсон организмида 3 ойгача сақланиб қолиши мумкинлиги айтилганди. «Спутник V» вакцинасининг клиник тадқиқотлари раҳбари Никита Ломакин эса коронавирусдан соғайганларда антитаналар тўлиқ 3-5 ойда йўқолиб кетишини ва улар қайта касалланиши мумкинлигини айтганди. Нью-Йоркдаги Mount Sinai тиббиёт маркази олимлари ҳам COVID-19’га қарши антитана касалликнинг енгил ёки ўртача шакли билан касалланган беморларда беш ойга яқин сақланиб қолади, деб ҳисоблаган.
