Сўнгги вақт, туринликларнинг ҳужум чизиғида муаммолар юзага келаётгани ҳеч кимга сир эмас. Жумладан, Альваро Мората яқинда жароҳатидан тузалиб, сафга қайтди ва кеча ўтган “Сассуоло”га (3:1) қарши учрашувнинг сўнгги дақиқаларида захирадан майдон тушди ҳамда формасига қайтиб олиши учун бироз вақт керак бўлади. Пауло Дибала эса ушбу ўйинда жароҳат олиб, Андреа Пирло учун олдинги чизиқда навбатдаги бош оғриғини юзага келтирди. Яна бир ҳужумчи Федерико Бернардески тўхталадиган бўлсак, 26 ёшли италиялик сўнгги бор “Юве” сафида ўтган мавсум июль ойида “Сампдория”га (2:0) қарши баҳсда гол урганди. Федерико Кьеза – позиция бўйича қанот вингери ва форвард бўлиб ҳам ўйнай олади. Бироқ, Пирло Кьезани асосан, ҳужумкор ярим ҳимоячи сифатида майдонга туширмоқда. Туринликлар сафида жорий мавсум энг стабил ўйнаётган футболчи эса ҳозирча Криштиану Роналду бўлиб турибди. Бироқ, унга олдинда тандем бўла оладиган шерик етишмаётгандек. ОАВ сўнгги хабарларига кўра, “Ювентус” марказий ҳужумчи изламоқда ва бир қатор номзодларни кўриб чиқмоқда. Италия гранди қишки трансфер бозоридаёқ улардан бирини ўз сафига қўшиб олишни режалаштирмоқда. Оливье Жиру – номзодлар ичида асосий фаворит Андреа Пирло интервьюларининг бирида Жируни ўз жамоасида кўришни истаётганини айтганди. “Ювентус” франциялик учун “Челси”га 3 млн евро таклиф этмоқчи ва унга 1,5 йил учун 3 млн евро тўламоқчи. 34 ёшли Жиру ўтган трансфер ойнасида “Юве” билан келишиб қўйгани ҳақидаги хабарлар тарқалганди. Унинг жорий мавсум клубдаги статистикаси: 14 та ўйин, 8 та гол Грациано Пелле – Хитойдаги саргузаштлари якунланди “Шаньдун Лунэн”ни эркин агент сифатида тарк этган Пелле яна Европага қайтмоқчи. Унга Осиё жамоаларидан ҳам қизиқиш бор. 35 ёшли италиялик А Серия ҳавосини олган ва бир қатор жамоалар ("Лечче", "Парма", "Сампдория"...) сафида ўйнаган. Ҳозирда унга “Ювентус” ва “Интер”да таклифлар борлиги айтилмоқда. Пелленинг 2020 йилдаги статистикаси: 22 та ўйин, 9 гол, 2 пас Фернандо Льоренте – “Ювентус”нинг собиқ аъзоси Льоренте 2013-2015 йиллар “Кекса сеньора” шарафини ҳимоя қилган ва фаолиятини ёмон ўтказмаганди. Унинг ҳозирги жамоаси “Наполи”даги иштироки эса кўнгилдагидек эмас. 35 ёшли форвард жорий мавсум неаполликлар сафида атиги 3 та ўйин (барчасида захирадан тушди) ўтказди ва самарали натижа кўрсатолмади. Умуман, Фернандо сўнгги бор рақиб дарвозасини 2019 йил (!) декабрида “Болонья”га (1:2) қарши ўйинда ишғол этганди. Уни жароҳатлар “синдирди”, десак адашмаган бўламиз. Элдор Шомуродов – Италиядаги янги ном ва юқоридагиларга нисбатан анча ёшроғи Охирги ўйинларда “Женоа”нинг энг фойдали футболчиларидан бири. Шу сабаб, “Ювентус” бош директори Фабио Паратичи ҳам Элдор қизиқиб қолгани ҳақида Италиянинг нуфузли нашрлари хабар тарқатди. "Ювентус"да молиявий аҳвол ижобий бўлмагани сабаб клуб Шомуродовни ижарага олишни режалаштирмоқда. Генуяликлар президенти Энрико Презиоси эса Шомуродовни камида мавсум охиригача қўйиб юбормоқчи эмаслигини билдирганди. Қайд этиш жоиз, “Женоа”ни 13 январ куни айнан “Ювентус”га қарши Кубок доирасидаги баҳс кутмоқда. Ким билади, балки, 25 ёшли ўзбекистонлик ушбу учрашувда ҳам ўзини кўрсатиб, “Юве”нинг қизиқиши янада ортишига сабаб бўлар… Элдорнинг жорий мавсумдаги статистикаси: 12 ўйин, 2 гол, 2 пас ("Женоа"да), 9 ўйин, 1 гол ("Ростов"да) Шунингдек, Турин суперклуби шорт-листидан Одсонн Эдуар (“Селтик”) ҳамда Аркадиуш Милик (“Наполи”) ўрин олгани айтилганди. Милик жароҳати туфайли ўтган йилнинг ноябридан буён майдонга тушмаётганини эслатиб ўтиш жоиз. P.S. "Ювентус" кимни танлайди деб ўйлайсиз? Элдор Акмурзаев тайёрлади
