Бугун ижтимоий тармоқларда "Сирдарё вилояти Ширин шаҳрида аёл ўзи ва фарзандларини каналга ташламоқчи" эканлиги акс этган видео кенг муҳокамаларга сабаб бўлди.
Кейинроқ, аёл Сирдарё вилояти, Ширин шаҳри ободонлаштириш бошқармасида ишловчи турмуш ўртоғи телефонига жавоб бермагани учун жаҳли чиққани, рашк устида ножўя гапларни гапирганини айтганди.
Ҳодиса бўйича мутасадди ташкилотлар вакиллари аёл билан суҳбат олиб борган.
"Бутун Ўзбекистон халқига бугундан кейин болаларимни оқ ювиб оқ тарашга ваъда бераман. Болаларимни сувга ташлаш ниятим йўқ эди. Асабим қўзиб тургани учун оғзимдан ўша фикрлар чиқиб кетган, тан оламан. Узр сўрайман", - дейди аёл.
Олиб борилган суҳбатлар давомида аниқланишича, ушбу ҳолатга оилавий келишмовчилик сабаб бўлган.
Аёлнинг эри ҳолатга қуйидагича муносабат билдирди:
"Ҳеч қанақа арзийдиган сабаб йўқ. Битта шу муаммо у-бу нарса олиб беринг деганида, шошмай тур, биринчи ўринда мен кредитимни тўлашим керак, дедим. Давлатдан кредит олганман".