БМТ Болалар жамғармаси (UNISEF) Ўзбекистон Соғлиқни сақлаш вазирлигининг Санитария-эпидемиологик осойишталик ва жамоат саломатлиги хизматига 10 декабрь куни иммунизация жараёнига ихтисослашган 16 та замонавий транспорт воситасини топширган. Бу ҳақда Соғлиқни сақлаш вазирлиги жамоатчилик билан алоқалар бўлими маълумот тарқатди.
Қайд этилишича, мазкур автотранспорт воситалари Санитария-эпидемиологик осойишталик хизматининг вилоят бўлимлари учун мўлжалланган бўлиб, улардан бутун мамлакат бўйлаб болаларнинг вақтида эмланганлиги мониторингини олиб бориш сифатини янада яхшилаш учун фойдаланилади.
Транспорт воситаларини топшириш маросимида автомобиллар UNISEF ҳамда Вакциналар ва иммунизация бўйича глобал алянс томонидан кўрсатилган кўмак ёрдамида Ўзбекистоннинг миллий эмлаш дастурини янада такомиллаштириш мақсадида сотиб олингани таъкидланган.
Бундан ташқари, UNISEF Соғлиқни сақлаш вазирлигига марказий, вилоят ва туман даражаларида вакцина омборларини қуриш ҳамда совуқхоналар, музлатгичлар ва совутгичларни сотиб олиш, уларни ўрнатиш ҳамда вакциналарни ташиш учун транспорт воситаларини сотиб олиш орқали миллий эмлаш дастурини кучайтиришга кўмаклашаётгани қайд этилган.
UNISEFнинг Ўзбекистондаги ваколатхонаси раҳбари ўринбосари Жефри Ижумба, мазкур транспорт воситалари, совуқлик занжирини таъминлаш учун тақдим этилган бошқа қурилмалар билан бир қаторда, бутун мамлакат бўйлаб болалар соғлиғини яхшилашга катта ҳисса қўшишига ишонч билдирган.
