АҚШ Давлат котиби Майк Помпео Европа ва Яқин Шарқдаги етти давлатга хизмат сафарини бошлади. Котиб Франция, Туркия, Грузия, Исроил, Қатар, Саудия Арабистони ва Бирлашган Араб Амирликларига боради.
Помпеонинг хизмат сафари унинг ўзи ва Республикачилар партиясининг аксар аъзоси АҚШ президент сайловида амалдаги президент Дональд Трамп демократ Жо Байденга мағлуб бўлганини тан олмаётган бир фурсатга тўғри келди.
Помпео собиқ вице-президент Жо Байден АҚШ президент сайловида ғолиб чиққанига шубҳа билдираётгани хавотир ва ғазабга сабаб бўлмоқда.
10 ноябрь куни журналистлар олдида сўзлаган Помпеога Давлат департаменти миллий хавфсизликни таъминлаш йўлида ҳокимиятни тинч ўтказиб бериш учун Байден билан ҳамкорлик қилаётгани ёки йўқлиги ҳақида савол берилди. Ушбу саволга жавобан Помпео «иккинчи Трамп маъмуриятига ўтишни кутаётганини» айтди.
Помпео сайлов натижасини тан олмаётган бўлса-да, аксар давлатлар, жумладан, котиб боришни режалаштираётган етти давлат етакчилари Байденни ғалаба билан аллақачон табриклади.
Помпео Туркияда бирорта ҳам расмий билан учрашмайди. Бунинг ўрнига у православ черкови патриархи Варфоломей I билан учрашиб, диний эркинлик масаласини муҳокама қилади. Бунга муносабат билдирган Туркия Ташқи ишлар вазирлиги АҚШни аввал «бир кўзгуга қарашга» чорлади.