Шакар ишлаб чиқарадиган иккита йирик заводлар фаолияти маълум сабабларга кўра тўхтаб қолган.
Кеча, 15 июль куни "Ангрен шакар" МЧЖ ва "Хоразм-шакар" МЧЖ корхоналари иш фаолиятини тўхтатгани ҳақида хабар берган эдик.
Мазкур хабар ортидан "Ангрен шакар" МЧЖ Бош директори Рустам Акбарходжаев ва "Хоразм-шакар" МЧЖ Бош директори Умиджон Комиловлар ўз муносабатини билдиришди.
Унга кўра, Ўзбекистондаги мавжуд иккита шакар заводи хом ашё тугаганлиги муносабати билан ишлаб чиқаришни вақтинчага тўхтатган. Ҳозирча ушбу вазиятдан фойдаланган ҳолда заводдаги барча ускуналарда профилактик тозалаш ишлари олиб борилмоқда.
"Хорижий ҳамкорлар билан музокаралар ўтказган ҳолда хом ашё муаммоси ҳам бартараф этилмоқда. Яқин кунларда иккита заводда ишлаб чиқариш тўлиқ қувват билан бошлаб юборилади", дейилади завод директорлари муносабатида.