АГМК – «Қўқон-1912» учрашувидан кейинги матбуот анжуманининг биринчи қисмида меҳмонлар бош мураббийи Бахтиёр Ашурматов иштирок этди. Бу ҳақда клуб матбуот хизмати хабар берди. - Гапнинг очиғи, кайфият тушкун. Биринчи бўлимни яхши ўтказдик. Иккинчи таймни ҳам яхши бошлаган эдик. Лекин Санжар Турсуновнинг голи футболчиларга салбий таъсир ўтказди. Ушбу гол чемпионатнинг ҳақиқий безагига айланди. Йигитларга раҳмат айтаман, охиргача дуранг учун ўйнашди. Биз аҳил жамоа тузишга муваффақ бўлдик. Бугун ҳам шогирдларимга айтгандим. Биз сафарда ҳам очко йиғишни бошлашимиз керак. Тўғри ҳозир юқори ўринларнинг бирида боряпмиз. Аммо бугун асосий рақиблардан бирига мағлуб бўлдик. Чемпионатни ҳам юқори ўринларда якунлашни истасак, меҳмонда ҳам ғалаба қозонишимиз керак. Бугун ҳам ёмон ўйнамадик. Лекин бундан ҳам яхшироқ ўйнашимиз лозим. Йигитларда руҳиятни ўзгартиришга муваффақ бўлдик. Уларда ўзига бўлган ишончни қайтиришга эришдик. Шунинг учун бугун 2:0 ҳисобида ортда бораётганимизга қарамай, шогирдларим кучли жамоага қарши сўнгги дақиқага қадар кураш олиб боришди. Ўйлайманки, жамоамиз потенциали кучли ва биз мавсум якунига қадар ҳозирги ушбу темпни ушлаб туришга ҳаракат қиламиз. Бунинг учун меҳмонда нафақат дуранг балки, ғалаба учун ҳам ўйнашимиз керак. АГМКнинг ўйинини кўриб чиққанимизда рақиб сафида майдон марказини кучайтирадиган футболчилар кўп эканлиги ойдинлашди. Марказий таянч ҳимоямизни кучайтириш мақсадида Иқбол Маликжоновни майдонга туширдик. Танлаган таркибимиз ва тактикамиз ўзини оқламади дея олмайман. Иккинчи, чиройли гол ўйин тақдирини ҳал этди. Мавсум олдидан жамоа раҳбарияти билан гаплашганимизда, ҳар йили бўладиган муваффақиятсизликларни енгиб ўтишимиз ва юқорироқ ўринлар учун таркибни шакллантиришимиз кераклигини таъкидлашганди. Босқичма-босқич жамоани шакллантириб, Осиё Чемпионлар лигасида ўйнайдиган ўринлар учун курашамиз. Қисқа қилиб айтганда, олдимга аниқ мақсад қўйилмаган, лекин рақбоатбардош жамоа шакллантирмоқчимиз. Ҳозир ишларимиз ёмон эмас. Бу йилги мавсумнинг ўзидаёқ кучлилар сафига қўшилиш учун курашмоқчимиз, - деди Бахтиёр Ашурматов. Манба: Sports.uz
