Қозоғистон Денис Тенни сўнгги сафарга кузатди

Қозоғистоннинг Олмаота ва Остона шаҳарларида 21 июль куни таниқли спортчи, фигурали учиш устаси Денис Тен билан видолашув маросимлари бўлиб ўтди. Олмаотадаги спорт саройида ҳамда Остонадаги спорт мажмуасида ўтган маросимларга марҳум билан видолашиш учун унинг минглаб мухлислари келди.


Қозоғистонда спортчи Денис Тенни ўлдирганликда гумон қилинаётганлардан бири 20 июлда қўлга олинди. Олмаота шаҳар прокурори Берик Жуйриктаев жиноятни содир этганликда гумон қилинаётган , 1994 йилда туғилган Нурали Қиясов адвокат иштирокида берган кўрсатмасида жиноятни содир этганига иқрор бўлганини билдирди. Қиясов вақтинча сақлаш изоляторига киритилган.


Қиясов қўлга олинган куни унинг шериги деб гумон қилинаётган иккинчи шахс ҳам ушлангани хабар қилинди. Қозоғистон ички ишлар вазирилигига кўра, у Қизилўрда вилоятида туғилган 23 яшар Арман Кудайбергеновдир.Айтилишича, у Олмаота шаҳрининг Ақсай микрорайонида ўтказилган рейд давомида қўлга олинган.


19 июль куни Фигурали учиш бўйича беш марта Қозоғистон чемпиони Денис Тен Олмаотада номаълум шахслар томонидан пичоқлаб ўлдирилди.


Қозоғистон Соғлиқни сақлаш вазирлигининг Озодликка билдиришича¸ икки номаълум шахс томонидан пичоқланган Тен уч литр қон йўқотиш оқибатида касалхонада вафот этган.


Спортчи машинасининг ëн ойнасини ўғирлашган урингани айтилаëтган жиноятчилар қочишга муваффақ бўлган¸ ҳозирча ҳужум мотивларига оид аниқ маълумот йўқ.


Қозоғистон Маданият ва спорт вазирлиги Денис Теннинг ўлимини «улкан фожиа» деб атади ва унинг бирор мантиққа тўғри келмаслиги айтди.


Денис Тен Сочида ўтказилган қишки Олимпиадада бронза медалини қўлга киритган. У Қозоғистондаги муз устида ўтказилган шоу дастурга ҳам продюсерлик қилган.