World News in Tatar

Әлмәттәге «Луч» яшьләр клубында махсус хәрби операциядән ялга кайткан «Фотограф» кушаматлы сугышчы балалар белән очрашты. Алгы сызык турында чынлыкны бәян иткән батыр яшьләр белән бергә фронтка җибәреләчәк бүләкләр һәм хатлар әзерләде. Патриотик чара җәмгыятьнең бердәмлеген һәм яклаучыларыбызга булган ихтирамны тагын бер кат раслады. Бу хакта «Әлмәт таңнары» хәбәр итә.

Арча үзәк китапханәсендә татар әдәбиятының иң якты йолдызы Габдулла Тукайның тууына 140 ел тулу уңаеннан, Арча районындагы Г.Тукай исемен йөрткән уку йортлары арасында «Син Тукайны беләсеңме?» дигән темага библиобрейн-ринг узды, дип хәбәр итә «Арча хәбәрләре».

2026 елның 16-17 маенда Омск шәһәрендә «Себер моңы» татар җыры төбәкара фестиваль-конкурсы узачак. Бу хакта Бөтендөнья татар конгрессы матбугат хезмәте хәбәр итә.

Казанның «УРАМ» экстрим-паркында 30 марттан 1 апрельгә кадәр урам спорты төрләре буенча остаханәләр һәм ярышлар уздырыла. Чараны экстрим-паркы белән бергә InMotion оештыра. Катнашучылар үзләрен өч көн дәвамында алты дисциплина: паркур, трикинг, BMX, скейтборд, роликлар һәм самокат спорты төре буенча сынап карый ала, дип хәбәр итә Казан мэриясе матбугат хезмәте.

Тубыл шәһәре себер-татар мәдәният үзәгендә «Себер мирасы» дип аталган шигърият кичәсе узды. Чараны «Ак калфак» иҗтимагый хатын-кызлар оешмасы себер-татар мәдәният үзәге белән берлектә оештырды, дип хәбәр итә Римма Умитбаева «Яңарыш» газетасында.

Апаста Татарстанның атказанган сәнгать эшлеклесе, танылган драматург, язучы, режиссер Әмир Камалиев исемендәге «Бар дөнья - театр» районкүләм балалар театр коллективлары фестивале узды. Ул район башлыгы тәкъдиме белән дүртенче тапкыр оештырылды. Бу хакта «Апас-информ» хәбәр итә.

Анкара шәһәрендәге урамга Шәфыйка Гаспралы исемен биргәннәр. Тантаналы чара 27 мартта узган. Бу хакта Россия Федерациясе мөселманнары Диния идарәсе телеграм-каналында хәбәр итә.

Машина йөртүчеләр арасында күпчелекне ир-атлар тәшкил итә, әмма соңгы вакытта Россиядә тотрыклы рәвештә хатын-кыз йөртүчеләр өлеше арту тренды күзәтелә. Бу хакта Авито Авто кулланучыларының баш тикшеренүчесе Екатерина Ковалева хәбәр итте.

Татарстан Республикасында социаль өлкә объектларын, күпфатирлы йортларны һәм гидротехник корылмаларны капиталь ремонтлау программаларын гамәлгә ашыру дәвам итә. Бу хакта ТР Төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин республика Хөкүмәте йортында узган киңәшмәдә белдерде, дип хәбәр итә ТР Рәисе матбугат хезмәте.

30 марттан 1 апрельгә кадәр Казанда «Методик эшне үстерүдә алга китеш проектлары технологияләре» темасына II Республика методистлар форумы узачак. Чара академик М.И. Мәхмүтовның 100 еллык юбилеена багышланган һәм 184 нче гимназия базасында узачак. Бу хакта ТР Мәгариф һәм фән министрлыгы матбугат хезмәте хәбәр итә.