Эксперт пенсия исәпләгәндә җибәрелгән хаталарны ничек ачыкларга икәнен аңлатты
Россиялеләр Социаль фонд шәхси кабинетында яки «Дәүләт хезмәтләре» порталында мәгълүматларны тикшерсәләр, шулай ук стаж турындагы электрон мәгълүматны хезмәт кенәгәсендәге язмалар белән чагыштырып карасалар, пенсия билгеләгән вакытта җибәрелгән хаталарны ачыклый ала. Президент академиясенең эшкуарлык, хезмәт һәм корпоратив хокук кафедрасы доценты Мария Кутарова шулай дип белдерде. Бу хакта РИА Новости агентлыгы хәбәр итә.
Төгәлсезлекләрне ачыклау өчен шәхси кабинетта стаж, иминият взнослары күләме һәм башка параметрлар турында мәгълүматларны даими күзәтергә, шулай ук аларны документлар – хезмәт кенәгәсе, килешүләр, керемнәр хакында белешмәләр, хәрби билет һәм башка раслый торган материаллар белән чагыштырырга киңәш ителә.
Кутарова аңлатканча, пенсия исәпләүнең дөреслегенә шик туса, пенсионерларга Социаль фондтан пенсия билгеләү турында карар күчермәсен һәм шәхси счеттан өземтә соратып алырга кирәк. Шуннан соң исәпкә алынган мәгълүматларны булган документлар белән чагыштыру зарур.
Әгәр хаталар ачыкланса, эксперт тикшерү һәм яңадан исәпләүне сорап фондка язма гариза җибәрергә киңәш итә. Гаризаны караудан баш тартсалар, прокуратурага яки судка мөрәҗәгать итәргә кирәк.