Миңнеханов Татарстан белән Үзбәкстан арасында икътисади элемтәләр үсешен билгеләп үтте
Татарстан Рәисе Рөстәм Миңнеханов Үзбәкстанның энергетика министры Җурабәк Мирзамәхмүдев белән очрашты. Очрашу Казан Кремлендә узды, дип хәбәр итә ТР Рәисе матбугат хезмәте.
Үзбәкстан Энергетика министрлыгы башлыгы Казанга эш сәфәренә килде. Сәфәрнең төп максаты - «Энергопром-2026» Казан халыкара электр энергетикасы форумында катнашу.
Рөстәм Миңнеханов билгеләп үткәнчә, Татарстан белән Үзбәкстан арасындагы хезмәттәшлек елдан-ел динамик рәвештә үсә: яңа проектлар гамәлгә ашырыла, булган багланышлар киңәйтелә, үзара визитлар ясала. Үзбәкстан Республикасы Президенты Шәүкәт Мирзиёев 2024 елда Татарстанда ике тапкыр булды.
Республика Рәисе Татарстан белән Үзбәкстан арасында товар әйләнеше артуын билгеләп үтте. Узган ел нәтиҗәләре буенча ул 427 млн доллардан артып киткән - 13,5 процент үсеш.
Сәүдә-икътисади элемтәләрне үстерүгә Татарстанның Ташкенттагы Вәкиллегенең һәм Үзбәкстанның Казандагы Генераль консуллыгының уңышлы эшләве, Казан белән Ташкент, Сәмәрканд һәм Фирганә арасындагы туры авиаочышлар ярдәм итә. Татарстан Үзбәкстан төбәкләре белән багланышларны актив үстерә.
Әңгәмә барышында Рөстәм Миңнеханов һәм Журабек Мирзамәхмүдев энергетика, нефть эшкәртү һәм сәнәгать кооперациясен үстерү өлкәсендә хезмәттәшлекне арттыру перспективалары турында фикер алыштылар.
Шулай ук республика Рәисе Үзбәкстан партнерларын быелның маенда узачак «Россия - Ислам дөньясы: KazanForum» халыкара икътисади форумына чакырды.