Гидрометеорология үзәге Татарстанда апрель-сентябрь айларына һава торышын фаразлады
Россия Гидрометеорология үзәге Татарстанда 2026 елның апрель-сентябрь айларына температура һәм явым-төшемнәр фаразын тәкъдим итте. Фараз нигезендә, апрель климат нормасыннан (+5,4 градус) җылырак, ә явым-төшем күләме гадәттәгегә якын – 30 мм чамасы булачак.
Май, июнь һәм август айларында температура күпьеллык нормага якын була, дип фаразлый синоптиклар. Явым-төшем күләме шулай ук уртача күрсәткечләргә якын булырга тиеш.
Июльдә температура нормадан (+19,9 градус) югарырак булачак, дип көтелә. Сентябрьдә, киресенчә, явым-төшем азрак булуы ихтимал (норма – 48 мм чамасы).