Марат Галиев: Республиканың көче -– барлык хакимият баскычларының бердәм эшләвендә
ТР Дәүләт Советының Икътисад, инвестицияләр һәм эшкуарлык комитеты рәисе урынбасары Марат Галиев Фәрит Мөхәммәтшинның үзгәрешләр чорында Татарстанның иҗтимагый-сәяси тотрыклылыгын саклап калуга керткән өлешен билгеләп узды.
- Бүген Фәрит Мөхәммәтшинның Дәүләт Советы Рәисе вәкаләтләре вакытыннан алда гамәлдән чыгарылды.
«Татарстанның үз конфликтлы потенциалы бар иде – этник нигезләрдә дә, башка принципларда да. Әлбәттә, республика сәяси җитәкчелегенең казанышы – җәмгыятьне радикализациядән саклап калуга ирешү. Республика җитәкчелегендә сәяси дискуссияләргә, парламент демократиясенә, парламентаризм культурасына бик тиз өйрәнгән акыллы кешеләр булды», – диде Марат Галиев.
Депутат республиканың сәяси системасын торгызу 1980 еллар азагында карашларның капма-каршылыгы шартларында узганына басым ясады. «80нче еллар уртасында төрле карашлар булды. Бер партиядә булып, җәмгыятьтә монархизмнан анархизмга кадәр төрле карашлар хөкем сөрде, әгәр барысын да тыңласаң, илнең хаоска тәгәрәве ихтимал иде», – диде Галиев.
Депутат фикеренчә, Татарстанның төп казанышларыннан берсе – барлык хакимият баскычларының килешеп эшләвендә.
«Республиканың көче шунда: хакимиятнең барлык баскычлары – башкарма, закон чыгару, вәкиллекле органнары бергә эшләде. Бу – зур казаныш, барлык субъектларда да моңа ирешә алмадылар. Моның нәтиҗәсе –Татарстанның Россиядә яуланган абруе», – диде Марат Галиев.
Ул халыкара дәрәҗәдә дә Фәрит Мөхәммәтшинның ролен, аның берничә тапкыр Европа Советының җирле һәм төбәк хакимиятләре конгрессының актуаль мәсьәләләр комитеты рәисе итеп сайлануын билгеләп узды. «Ул анда республиканы гына түгел, ә бөтен Россияне тәкъдим итте. Ул чакта республиканың да, илнең дә абруе югары иде», – диде.
Марат Галиев 2026 елда Татарстан парламенты Россиядә сайлаучылар өчен иң ачык парламент булып танылганын, Фәрит Мөхәммәтшинның берничә тапкыр иң яхшы парламент башлыгы итеп сайланганын искәртте.
Галиев әйтүенчә, хәзерге чакырылыш депутатлары Фәрит Мөхәммәтшин эшләгән елларда төзелгән парламент культурасы традицияләрен саклау һәм үстерүне үз бурычы итеп саный.