Онкология диспансеры табиблары бер операция вакытында пациенттагы өч шешне алган
Татарстанның Республика клиник онкология диспансеры табиблары өч онкодиагнозлы пациентка операция ясаган. Бу хакта клиниканың матбугат хезмәте хәбәр итә.
Хатын-кыз диспансерга сул сөт бизендә шеш булуга шикләнеп мөрәҗәгать итә. Диагностикадан соң сектораль резекция ясала — шешле тукыма өлеше алына, материал гистология тикшерүенә җибәрелә.
Табиблар анализ нәтиҗәләрен көткән арада пациентта яңа шикаятьләр барлыкка килә — ашказаны өлкәсендә авырту, күңел болгану. Сәбәбен ачыклау өчен табиблар диагностиканы дәвам итә.
Гастроскопия ашказаны шешен, ә колоноскопия — сигмовид эчәктә дә шеш барлыгын ачыклый. Сүз өч төрле онкология авыруы турында бара, аларның һәрберсе дәвалануны таләп итә.
Табиблар барысына да бер операция ясарга була. Күп этаплы операция биш сәгать дәвам итә. Ашказаны һәм шешле юан эчәк өлеше алына. Аннан соң шешле сөт бизләрен алалар, диелә хәбәрдә.